China Construction Bank Qazaqstanda ókildigin ashpaq
Onyń aıtýynsha, Nursultan Nazarbaevtyń Qytaıǵa memlekettik sapary aıasynda Qazaqstan-Qytaı iskerlik keńesiniń 5 otyrysy eki eldiń bıznes ókilderiniń qatysýymen ótken. Shara aıasynda 13 mlrd dollardyń 40-tan astam kelisimshartyna qol qoıylǵan. Onyń ishinde 8,7 mlrd dollardyń 17 ınvestıtsııalyq, 1,6 mlrd dollardyń 8 qarjylyq, 700 mln dolllardyńǵa 7 syrtqy saýda qujaty bar. Munan bólek 8 kommertsııalyq qujat ta rásimdeldi.
«Qol qoıylǵan qujattardyń jartysy ınvestıtsııalyq sıpatqa ıe ekendigin atap ótken jón. Biz qytaılyq kompanııalardyń qaıta óńdeý sektoryna, logıstıkaǵa, ınfraqurylym men aýyl sharýashylyǵy ónimderin qaıta óńdeýge mol ınvestıtsııa sala bastaǵanyn kórip otyrmyz», - dedi qor basshysy.
Sonymen qatar ol Qazaqstanda Qytaıdyń úsh banki jumys isteıtindigin jáne taǵy bir banki ókildik ashýǵa nıet tanytyp otyrǵanyn aıtty.
«Búginde Qazaqstanda qytaılyq kapıtaldyń qatysýymen 3 kommertsııalyq bank jumys isteıdi. Sonymen qatar búgingi sharaǵa basshysy Tszıan Golın qatysyp otyrǵan China Construction Bank óz ókildigin ashýdy josparlaýda. Qytaıdyń kommertsııalyq bankteri taıaý aralyqta Qazaqstanda jumys istep jatqan qytaılyq kásiporyndardy ǵana emes sonymen birge qazaqstandyq kompanııalardy da qarjylandyrady dep úmit artamyz», - dedi Ahmetjan Esimov.
Aıta keteıik, Elbasy Nursultan Nazarbaev Qytaıǵa memlekettik saparmen kelip, keshe QHR Tóraǵasy Sı Tszınpınmen keńeıtilgen quramda kelissózder ótkizdi.
Nátıjesinde birneshe qujatqa qol qoıyldy.
Sonymen qatar Memleket basshysy QHR Memlekettik keńesiniń premeri Lı Ketsıanmen júzdesti.
Al 10 maýsym kúni QR Prezıdenti Tsındao qalasynda ótetin Shanhaı yntymaqtastyq uıymyna múshe memleketter basshylarynyń keńesine qatysady dep kútilýde.
