Chılıdiń ońtústigindegi eki óńirde orman órtine baılanysty tótenshe jaǵdaı jarııalandy

ASTANA. KAZINFORM — Jeksenbi kúni Chılı prezıdenti Gabrıel Borıch eldiń ońtústigindegi eki óńirde orman órtteriniń órshýine baılanysty tótenshe jaǵdaı rejımin engizgenin málimdedi, dep habarlaıdy Azertadj.

Tabıǵı apat saldarynan keminde 18 adam qaza taýyp, kem degende 20 myń adam evakýatsııalandy, 250 turǵyn úı qıraǵan.

Chılıdiń orman sharýashylyǵy agenttigi CONAF derekterine sáıkes, jeksenbi tańyndaǵy jaǵdaı boıynsha el aýmaǵynda 24 belsendi órt oshaǵy tirkelgen. Olardyń eń irileri Nıýble jáne Bıo-Bıo óńirlerinde ornalasqan. Dál osy aımaqtarda úkimet tótenshe jaǵdaı jarııalady.

Atalǵan óńirler el astanasy Santıagodan shamamen 500 shaqyrym ońtústikte ornalasqan.

Qazirgi ýaqytta eki óńirde órt shamamen 8 500 gektar aýmaqty sharpyp, kóptegen eldi mekenge qaýip tóndirip otyr. Osyǵan baılanysty bılik ókilderi evakýatsııalaý týraly sheshim qabyldady.

Bılik ókilderiniń aıtýynsha, qolaısyz aýa raıy jaǵdaılary – qatty jel men joǵary temperatýra – orman órtteriniń keńinen taralýyna áser etip, órt sóndirýshilerdiń jumysyn edáýir qıyndatqan. Chılıdiń basym bóliginde aptap ystyqqa baılanysty eskertý jarııalanǵan.

Dúısenbi kúni Santıagodan Bıo-Bıo óńirine deıingi aýmaqta aýa temperatýrasy 38°C-qa deıin jetedi dep kútilgen.

Jyl basynan beri Chılı men Argentınada da aptap ystyq baıqalyp otyr. Qańtar aıynyń basynda Argentınanyń Patagonııa aımaǵynda joıqyn orman órti tutanǵan edi.

Aıta ketelik Argentınada orman órtine baılanysty myńdaǵan týrıst evakýatsııalandy.