Chılıdegi zilzala kezinde japa shekken qazaqstandyqtar týraly aqparat túsken joq - QR SІM
ASTANA. Naýryzdyń 1-i. QazAqparat /Jasulan Amanbaıuly/ - Chılıdegi zilzala kezinde japa shekken qazaqstandyqtar týraly aqparat ázirshe túsken joq.
Bul týraly búgin brıfıngte QR Syrtqy ister mınıstrliginiń resmı ókili Asqar Ábdirahmanov málim etti, dep habarlaıdy QazAqparat.
Degenmen, úzildi-kesildi aıtýǵa bolmaıdy. A. Ábdirahmanovtyń sózine qaraǵanda, Chılıdegi jer silkinisinen mert bolǵandar men jaraqattanǵandar týraly mardymdy aqparat alý qıyn bolyp otyr. Bunyń aldynda habarlaǵanymyzdaı, zilzaladan zardap shekken keıbir aýdandarda jaryq, telefon baılanysy joq, aýyzsý jetispeýshiligi baıqalýda. Jer silkinisi saldarynan Santıagonyń halyqaralyq áýejaıy jabyldy, reısterdiń bári toqtatyldy.
Resmı derekter boıynsha, zilzala qurbandary 700-ge jetti.
Esterińizge sala keteıik, Chılıde ótken aptada kúshi Rıhter baǵamy boıynsha 8,5 balldyq zilzala boldy. AQSh-tyń Ulttyq geologııalyq qyzmetiniń habarlaýynsha, zilzalanyń kindigi Konsepson qalasynan soltústik-shyǵysqa qaraı 91 shaqyrym qashyqtyqta jáne Santıago qalasynan 339 shaqyrym jerde bolǵan. Zilzala oshaǵy 55 shaqyrymdyq tereńdikte oryn alǵan.
