Chılıdegi saılaý: Hose Antonıo Kast el prezıdenti bolyp saılandy

ASTANA. KAZINFORM — Chılıde 14 jeltoqsan, jeksenbi kúni ótken uzaqqa sozylǵan saılaý naýqanynyń qorytyndysy boıynsha Hose Antonıo Kast Respýblıka prezıdenti bolyp saılandy, dep habarlaıdy jergilikti Tvn.cl telearnasy.

Saılaý komıssııasy (Servel) keshki saǵat 19:00-den keıin jańartqan derekterge sáıkes, daýystardyń 25 paıyzdan astamy eseptelgen kezde respýblıkalyq kandıdat Hose Antonıo Kast 59,83% daýys jınady. Onyń qarsylasy Janett Hara («Chılı úshin birlik» koalıtsııasy) 40,17% daýys aldy.

Cadem jáne Pulso Ciudadano ortalyqtary saýalnamalarynyń derekterine súıensek, 29 qarashada jarııalanǵan Cadem kompanııasynyń atty sońǵy saýalnamasyna sáıkes, Hose Antonıo Kast 58% qoldaýǵa ıe bolyp, Janett Haradan 16 paıyzdyq mejede alda bolǵan. Osy saýalnamada Janett Hara 42% nátıje kórsetken.

Sonymen qatar dál sol kúni Pulso Ciudadano kompanııasy usynǵan aldyn ala elektoraldyq boljamǵa sáıkes, Hose Antonıo Kast jaramdy daýystardyń 58,9%-yn alýy múmkin ekeni, al Janett Hara 41,1% daýys jınaýy yqtımal ekeni kórsetilgen.

Eske sala ketsek, buǵan deıin Chılıde prezıdent saılaýynyń ekinshi týry bastalǵanyn jazdyq. Memleket basshysy laýazymyna solshyl kúshter koalıtsııasynan úmitker Janett Hara jáne konservatıvtik respýblıkalyq partııanyń kandıdaty Hose Antonıo Kast talasqan edi.