Chılıde jer silkinisine baılanysty bir mıllıon adam kóshirildi
ASTANA. QazAqparat - Chılıdiń Tynyq muhıt jaǵalaýyndaǵy kúshti jer silkinisi men tsýnamıge baılanysty kóshirilgen adamdardyń jalpy sany bir mıllıon adamǵa jetti. Bul týraly keshe keshte el ishki ister mınıstri Rodrıgo Penıaılılo málim etti, dep habarlady reseılik «Jańalyqtar» agenttigi jergilikti BAQ-qa silteme jasap.
«Seısenbi kúni keshte tsýnamı jónindegi qaýip dabyly berilgennen keıin kóshirilgender sany bir mıllıon adamdy qurady», - degen mınıstrdiń málimdemesin keltirgen BAQ. Chılı kóshbasshysy Mıshel Bachelet jer silkinisinen zardap shekken Arıka qalasynda bolǵanyn habarlady. Onyń aıtýynsha, beısenbi kúni Arıka-jáne-Parınakot jáne Tarapaka óńirlerinde mektepterde sabaqtar toqtatyldy.
Tótenshe jaǵdaılar jónindegi ulttyq basqarmanyń málimetteri boıynsha, zardap shekken óńirlerde elektr jelisi 90 paıyzǵa, sýmen qamtamasyz etý - 67 paıyzǵa qalpyna keltirilgen. Tarapaka óńirinde 38 myń úı sharýashylyǵy jaryqsyz qalyp otyr. Ikıke qalasy mańyndaǵy Alto-Ospıso eldi mekeninde shamamen eki myń turǵyn úıge zalal kelgen.
Chılı vedomstvolary jalpy shyǵyn kólemin esepteýmen aınalysýda.
Seısenbi kúni keshte bolǵan terbelisi 8,2 balldyq qýatty jer silkinisiniń kindigi Tynyq muhıtta Chılıdiń Ikıke qalasynan soltústik-batysqa qaraı 83 shaqyrym jerde boldy. Jer silkinisiniń oshaǵy 20 shaqyrym tereńdikte bolǵan. Ikıke aýdany jaǵalaýynda bıiktigi 2 metr 11 santımetrge jetken tsýnamı tirkeldi. Bıiktigi jarty metrge jýyq tolqyndar Perýde de boldy.
