Chılıde jasandy ıntellekt sýarý kezindegi sý shyǵynyn 54%-ǵa azaıtty
ASTANA. KAZINFORM – Chılıdegi La-Serena ýnıversıteti ázirlegen joba aýyl sharýashylyǵy daqyldaryn sýarý kezindegi sý shyǵynyn 54,4%-ǵa qysqartty, dep habarlaıdy TV BRICS.
Jasandy ıntellekt pen topyraq ylǵaldylyǵyn ólsheıtin datchıkterge negizdelgen tehnologııa Kokımbo óńirindegi shaǵyn jáne orta fermerlerge klımattyń ózgerýi saldarymen kúresýge kómektesýge arnalǵan.
Jergilikti El Maipo basylymynyń málimetinshe, «Ónimdilikti arttyrýǵa arnalǵan aqyldy aýyl sharýashylyǵy» jobasy ıntellektýaldy datchıkterdi, avtomattandyrý júıelerin jáne jasandy ıntellektini paıdalanady. Ázirlengen júıe topyraqtyń ylǵaldylyǵyn ólshep, ósimdikke sý qajet bolǵan kezde ǵana sýarýdy avtomatty túrde iske qosady. Bul arzan jabdyqtyń kómegimen sýdy tıimsiz paıdalanýdy azaıtýǵa múmkindik beredi.
– Biz óńirdegi shaǵyn jáne orta fermerlerge jasandy ıntellekt pen datchıkter júıesine negizdelgen avtomattandyrylǵan sýarý arqyly qurǵaqshylyqtyń saldaryn eńserýge kómektesetin qoljetimdi tehnologııalyq sheshim usynýdy kózdeımiz, – dedi joba jetekshisi, La-Serena ýnıversıtetiniń zertteýshisi Ýmberto Farıas.
Kokımbo óńiriniń gýbernatory Krıstobal Hýlıa topyraqtyń ylǵaldylyǵyn ólsheý úshin mıkrokontrollerler men jasandy ıntellekt qoldanylyp jatqanyn aıtty. Onyń sózinshe, bul sý resýrstaryn tıimdi basqarýǵa múmkindik beredi.
Joba aıasynda bul tehnologııalar aýyl sharýashylyǵy mektepterine de engizilip jatyr. Onyń maqsaty – aýyldyq jerlerdegi oqýshylardy zamanaýı ınnovatsııalarmen tanystyrý.
Elkı ańǵaryndaǵy aýyl sharýashylyǵy mektebiniń dırektory Sesılııa Dıas stýdentterdiń júıelerdiń jumysymen tájirıbe júzinde tanysyp, olardy qurastyryp, qaıta bólshekteı alatynyn atap ótti. Onyń aıtýynsha, bul túlekterge eńbek naryǵyna salada suranysqa ıe daǵdylarmen shyǵýǵa múmkindik beredi.
La-Serena ýnıversıteti bul tehnologııany basqa da bilim berý uıymdary men aýyl sharýashylyǵy óndirýshileri arasynda keńinen engizýdi josparlap otyr. Bul klımattyń ózgerýi jaǵdaıynda sý resýrstaryn utymdy basqarýǵa yqpal etedi.
Aıta keteıik, jýyrda Moonshot AI JI-diń álemdegi eń iri erekshe modelin tanystyrdy.
Al Japonııada jasandy ıntellektiniń kómegimen 46 myń akkaýntty óshirgen kúdikti qamaýǵa alyndy. Ol 15 jastaǵy jasóspirim bolyp shyqty.
Al nemis ǵalymdary dabyl qaqty. Sebebi jurtqa JI-di oqytý úshin Germanııadaǵy antıkvarlyq kitaptar joıylyp jatyr.
