Chılıde prezıdent saılaýynyń ekinshi týry ótedi

ASTANA. KAZINFORM — Búgin Chılıde prezıdent saılaýynyń ekinshi týry ótedi. Qazirgi memleket basshysy Gabrıel Borıch Konstıtýtsııaǵa sáıkes qatarynan ekinshi merzimge túse almady, dep habarlaıdy TASS.

Ekinshi týrǵa solshyl ustanymdaǵy «Chılı úshin birlik» koalıtsııasynyń kandıdaty Janett Hara jáne konservatıvti Respýblıkalyq partııanyń ókili Hose Antonıo Kast shyqty. Bul úmitkerlerdiń ekeýi de 50 paıydan joǵary bar alǵanymen, alǵashqy týrda jeńiske jete almady.

Janett Hara buryn eńbek jáne áleýmettik qamsyzdandyrý mınıstri bolǵan. Onyń baǵdarlamasy eńbek jaǵdaıyn jaqsartýǵa, shaǵyn jáne orta bıznesti qoldaýǵa baǵyttalǵan. Ol eń tómengi jalaqyny 750 myń pesoǵa deıin kóterýdi, kásipkerlerge sýbsıdııa berýdi jáne ınfraqurylymdy damytýdy usynady. Qaýipsizdik máselesinde polıtsııany jańǵyrtý, jańa túrmeler salý jáne zańsyz kóshi-qonmen kúresý sharalaryn kúsheıtýdi kózdeıdi. Syrtqy saıasatta Chılıdiń AQSh, Qytaı jáne Eýroodaqpen teńgerimdi qarym-qatynas ornatýyn qoldaıdy.

Hose Antonıo Kast memlekettiń ekonomıkaǵa aralasýyn azaıtyp, qylmysqa qarsy qatań saıasat júrgizýdi jaqtaıdy. Ol korporatıvtik salyqty tómendetip, memlekettik shyǵyndardy qysqartýdy, shekaralarda qorshaýlar ornatýdy usynady. Kast abortqa, evtanazııaǵa jáne birjynysty nekege qarsy.

Saýalnamalarǵa sáıkes, saılaýshylardyń 46%-y Kastty, 34%-y Harany qoldaýǵa daıyn. Chılıde daýys berý mindetti, saılaý ýchaskeleri tańǵy 8:00–den keshki 18:00–ge deıin ashyq bolady.

Buǵan deıin Chılıde prezıdenttik jáne parlamenttik saılaý ótetinin jazdyq.

Eske sala ketsek, jýyrda AQSh prezıdenti Donald Tramp Ýkraınada prezıdent saılaýyn ótkizetin ýaqyt kelgenin aıtqan edi. Al Vladımır Zelenskıı prezıdenttik saılaýǵa daıyn ekenin málimdedi.