Chılıde búgin prezıdent pen parlamentti saılaıdy
ASTANA. 17 qarasha. QazAqparat - Chılıde búgin prezıdent saılaýy ótedi. Sondaı-aq memleket basshysynan basqa, azamattar parlamenttiń tómengi palatasy quramyn (120 depýtat) tolyǵymen jáne senatorlardyń jartysyn jańartyp, sonymen qatar 278 aımaqtyq keńesshilerdi saılaıdy, dep habarlady RBK.
Prezıdent oryntaǵyna negizi úmitkerler «Jańa kópshilik» solshyl koalıtsııasynan úmitker, eldiń burynǵy prezıdenti Mıshel Bachelet pen «Alıans Chılı úshin» solshyl-ortashyl partııadan úmitker Evelın Matteı dep sanalýda. Qoǵamdyq pikir saýaldamasynyń nátıjesi boıynsha 2006-2010 jyldary el basqarǵan M.Bachelettiń múmkindigi mol.
Chılı konstıtýtsııasy prezıdenttik oryntaqqa qatarynan bir merzimnen artyq saılanýǵa tyıym salady, biraq ta úzilisten keıin qaıtadan daýysqa túsýge kedergi jasamaıdy. Qalǵan úmitkerler olardan edáýir keıin qalyp keledi. Prezıdenttik dodaǵa barlyǵy 9 adam qatysýda.
M.Bachelet pen E.Matteı 1973 jylǵy general Aýgýsto Pınochettiń basqarýymen bılikke kelgen áskerı hýnta tóńkerisinen keıin bir-birine qarsy ustanymdaǵy generaldardyń qyzdary. M.Bachelettiń ákesi tóńkeristen keıin áskerı-áýe kúshteri akademııasynyń túrmelerinde azap shekti, bul akademııanyń basshysy Alberto Matteı bolǵan edi. Biraq ta sońǵysy óz atyna aıtylǵan aıyptaýdy moıyndamaıdy, oǵan túsinikteme bermeıdi jáne jurt aldyna da shyqpaıdy.
Áleýmettanýshylardyń baǵalaýynsha, prezıdenttik saılaý eki týrda ótýi yqtımal. Degenmen, M.Bachelettiń alǵashqy týrda-aq jeńiske jetýine múmkindigi bar.
Chılıde 18 jasqa tolǵan jáne qylmystyq qýdalaýǵa ushyramaǵan barlyq azamattardyń daýys berýge quqyǵy bar. Halyqtyń jalpy sany 17 mln. 402 myń adamdy quraıdy. El prezıdenti 4 merzimge saılanady.
