Chılı shahtasyndaǵy apat: barlyq jumysshy mert boldy

ASTANA. KAZINFORM — Chılıdegi El-Tenente mys shahtasynda bolǵan opyrylý saldarynan úıindi astynda qalǵan bes jumysshynyń barlyǵy qaza tapty. Bul týraly Reuters agenttigi habarlady.

Qaıǵyly oqıǵa týraly jeksenbi kúni Codelco taý-ken kompanııasy resmı túrde málimdedi. Jalpy alǵanda, shahtadaǵy apattan alty adam kóz jumdy. Olardyń biri apat bolǵan sátte — beısenbi kúni keshke birden qaza tapsa, qalǵan bes adamnyń denesi 70 saǵattan keıin tabyldy.

Shahtadaǵy opyrylý Chılı tarıhyndaǵy eń kúshti seısmıkalyq dúmpýlerdiń birimen baılanysty. Jer silkinisi El-Tenente shahtasyna eleýli zaqym keltirgen.

Chılı prezıdenti Gabrıel Borıch elde úsh kúndik ulttyq aza tutý kúnin jarııalady.

Jergilikti BAQ-tyń málimetinshe, úıindi astynda qalǵan er adamdardyń jastary 29 ben 34 jas aralyǵynda bolǵan. Olar jer qazý jumystaryna mamandanǵan Gardilcic kompanııasynda jumys istegen.

Qutqarý operatsııasy juma kúni keshke, aftershoktar toqtaǵannan keıin bastaldy. Alǵashqy jumysshy senbi kúni, qalǵan tórteýi jeksenbide tabyldy. Іzdestirý-qutqarý jumystaryna 100-ge jýyq adam jumyldyryldy.

Eske sala keteıik, buǵan deıin Chılıde Kamchatkadaǵy jer silkinisinen keıin tsýnamı qaýpi týraly dabyl jarııalanǵan bolatyn.