Chılı mýzykanty Dımashtyń ánderin ıspan tiline aýdaryp, oryndap júr
Djonatan Donoso – talantty vokalısterdiń biri. Onyń Dımash ánderin ıspan tilinde oryndap, tyńdarmandarǵa kaver arqyly jetkizip júrgenine bir jyldan asty. Osylaı ol kópke ónerde til kedergisiniń joqtyǵyn dáleldep, qazaqstandyq oryndaýshynyń shyǵarmalarynan shabyt alyp júr.
Chılı ánshisi Djonatan Donoso bala kezden shyǵarmashylyqqa bet burdy. Segiz jasynda festıvaldarǵa qatysyp, án jáne anımatsııalyq keshterde óner kórsetti. Osylaı mýzykaǵa alǵashqy qadam basty. Jasy 32-ge kelgen ánshiniń áli kúnge deıin án ónerine súıispenshiligi óshken emes.
Djonatan Chılıdegi shaǵyn, biraq óte ádemi qala Renoda dúnıege kelgen. Qazir ol súıiktisi Anıta Lıgerospen birge San-Fernandoda turady. Emılııa, Martın jáne Danaı esimdi úsh balasy bar.
Djonatan bir jyl buryn Dımashtyń «S.O.S» ánin oryndap, Youtube jelisine júktegen bolatyn. Óziniń aıtýynsha, osy sátten bastap onyń ómiri túbegeıli ózgerdi.
Osydan keıin Djonatan qazaq uly Dımashtyń shyǵarmalaryn qalt jibermeı qadaǵalap otyrǵan. Jańa ánderin taǵatsyzdana kútýdi ádetke aınaldyrdy. Onyń ánderine kaver jasaýǵa qushtarlyǵy oıandy. Shyǵarmany qaıta oryndaý ǵana emes, ánniń mátinin ıspan tiline aýdaryp oryndaýdy qolǵa aldy.
«Ándi tyńdaǵan kezde men onyń maǵynasyn túsinbeımin, óıtkeni basqa tilde. Biraq ol maǵan qatty unap, bir áreket jasaýǵa belgi bergendeı boldy. Bul sezim Dımashtyń «Give Me Love» ánin tyńdaǵan kezde paıda boldy. Ánniń áýeni qatty áser etti de birden aýdarmasyn izdedim. Aýdarmasy tipti tańqaldyrdy. Mátin meniń basymnan ótken qıyn kezeńder men oılarymdy sıpattaǵandaı bolyp, birden kaver jasaımyn dep sheshtim», – deıdi vokalıst.
Djonatan ánniń aýdarmasynyń úsh nusqasyn taýyp, ıspan tilinde ádebı mátin jazdy. Osydan keıin, óziniń alǵashqy shyǵarmasyn oryndap, vokalıst ony Smule jáne YouTube platformasyna júktedi.
Djonatannyń kompozıtsııa nusqasyna Dımashtyń Dear-larynan qyzyqty pikirler kele bastady. Bul vokalıst úshin kútpegen jaǵdaı boldy. Ony qoldaǵandar Djonatannan tańǵajaıyp shyǵarmalaryn toqtatpaýdy surap, jalǵasyn kútetinin jetkizdi. Buǵan deıin qazaqstandyq ánshiniń shyǵarmasyn ıspan tilinde eshkim estimegen.
Sol kúnnen bastap Djonatan Dımashtyń ánderine kóbirek kaver jasaý týraly sheshim qabyldady. Osylaısha onyń mýzykasynyń Latyn Amerıkasyna taralýyna yqpal etti.
Djonatannyń arnasyndaǵy sońǵy vıdeolardyń biri - Dımashqa arnaıy jazylǵan kýeka. Vokalıst bul arnaýdy Anıta Lınerospen birge oryndady.
