Chıkýngýnıa vırýsy álemge taralyp jatyr – DDU dabyl qaqty

ASTANA. KAZINFORM – Dúnıejúzilik densaýlyq saqtaý uıymy (DDU) Chıkýngýnıa vırýsynyń taralýyna baılanysty alańdaýshylyq bildirdi, dep habarlaıdy Reuters.

Uıymnyń baǵalaýynsha, bul vırýs juǵýy múmkin 119 elde shamamen 5,6 mıllıard adam ómir súredi.

— Bul epıdemııa 20 jyl buryn jahandyq deńgeıge jetti. Qazir vırýstyń órshýi Eýropa men basqa qurlyqtarǵa da taraldy. 2025 jyldyń basynan beri aýrýdyń jańa tolqyny baıqalyp otyr. Eń kóp jaǵdaı Úndi muhıty araldarynda tirkeldi, — delingen DDU málimdemesinde.

DDU ókili Dıana Rohas Alvarestiń aıtýynsha, qazirgi ýaqytta vırýs Madagaskar, Somalı, Kenııa, sondaı-aq Ońtústik-Shyǵys Azııa elderinde keńinen taralyp jatyr.

Frantsııada úsh aıǵa jetpeıtin ýaqyt ishinde shetelden kelgen 800-ge jýyq adamnan vırýs anyqtaldy. Jaqynda Italııada da alǵashqy jaǵdaı tirkeldi.

Mamandar bul vırýsty masalar taratady jáne ol dene qyzýynyń joǵarylaýyna, býyndardyń aýyrsynýyna, tipti uzaq merzimdi eńbekke jaramsyzdyqqa ákelýi múmkin ekenin eskertedi.

Aıta keteıik, buǵan deıin Chıkýngýnıa bezgeginiń órshýi Qytaıdyń ońtústiginde de tirkelgen.