Chıkýngýnıa indeti: Qytaıda syrqattanýdyń jańa jaǵdaılary azaıyp keledi

ASTANA. KAZINFORM — Ońtústik Qytaıdaǵy Gýandýn provıntsııasynyń Foshan qalasynda chıkýngýnıa bezgegimen syrqattanýdyń jańa jaǵdaılarynyń sany birqatar aldyn alý sharalarynyń arqasynda azaıǵan, dep jazady Sınhýa.

Qala ákiminiń orynbasary Ven Sı baspasóz máslıhatynda málimdegendeı, sońǵy bes kún ishinde táýligine 200-den az jańa jaǵdaı tirkelgen. Bul indettiń erte kezeńde tıimdi túrde tejelip jatqanyn kórsetedi.

Onyń aıtýynsha, aýyr jaǵdaılar men ólim-jitim tirkelmegen, al naýqastardyń 90 paıyzdan astamy saýyǵyp ketken.

Sońǵy ýaqytta negizgi kúsh naýqastardy emdeýge, masalarmen kúreske jáne qorshaǵan ortany tazartýǵa baǵyttalǵan. Naqty qolǵa alynǵan sharalar qatarynda — masalardyń ósip-ónetin jerlerin joıý, turyp qalǵan sýlardy qurǵatý jáne eresek masalardy ýlaý bar. Aýrý kóp tirkelgen aýyldar men aýdandarda dezınfektsııa jumystary júrgizilgen.

Degenmen, bılik ókilderi qaýip áli de bar ekenin eskertedi. Jyl saıynǵy sý tasqyny kezeńindegi nóser jaýyn men taıfýndar masalardyń belsendiligin arttyryp, vırýs taralý qaýpin kúsheıtýi múmkin.

— Biz qol jetkizgen nátıjelerdi bekitý úshin qoǵamdyq densaýlyq saqtaý naýqandaryn jalǵastyramyz, masalardyń kóbeıý oryndaryn joıamyz jáne kúresti kúsheıtemiz, — dedi Ven Sı.

Chıkýngýnıa bezgegi — bul jedel vırýstyq juqpaly aýrý, ol qyzba, bórtpe jáne býyn aýrýlarymen sıpattalady. Vırýs adamǵa zaqymdanǵan masanyń shaǵýy arqyly juǵady.

Osyǵan deıin habarlanǵandaı, Qytaıdyń ońtústiginde myńdaǵan adam chıkýngýnıa vırýsyn juqtyrdy.