Chıkagodaǵy Qazaq center uıymy sý tasqynynan zardap shekkenderge qarjylaı kómektespek

ASTANA. KAZINFORM – Chıkagodaǵy Qazaq center uıymy da elge kómek retinde Gofundme platformasy arqyly qarjylaı kómek jınaıtynyn habarlady.  

Jınalǵan qarajattyń 100 paıyzy Qazaqstannyń zardap shekken aımaqtarynda jumys istep turǵan, tekserilgen uıymdarǵa tikeleı aýdarylady. Olar muqtaj jandarǵa qol jetkizý úshin óte qıyn jaǵdaıda táýlik boıy jumys isteıdi.

«Qazirgi ýaqytta Qazaqstannyń birneshe aımaǵynda iri sý tasqyny bolyp jatyr. Kóptegen otbasylardyń úıi sýǵa ketti nemese qarǵyn sýdyń saldarynan turýǵa jaramsyz bolyp qaldy. Olar endi ýaqytsha baspanadan pana izdeýge májbúr. Jaǵdaı óte qıyn, shuǵyl kómek qajet» — dep jazdy Chıkagodaǵy Qazaq Qaýymdastyǵynyń Ortalyǵy áleýmettik jelidegi paraqshasyna. 

Uıymdastyrýshylardyń aıtýynsha, qaıyrymdylyq maqsatynda jınalǵan qarajat tómendegi qajettilikterdi qamtamasyz etýge kómektesedi:

— Muqtaj otbasylarǵa shuǵyl turǵyn úı, azyq-túlik, taza sý jáne medıtsınalyq kómek
— Barlyǵyn joǵaltqandar úshin kórpe, gıgıenalyq jıyntyq, náreste kerek-jaraqtary jáne t. b.
— Sý tasqyny basylǵannan keıin otbasylarǵa úıleri men ómirin qalpyna keltirý úshin uzaq merzimdi kómek.

«Óz úlesińizdi qosyp, osy naýqandy múmkindiginshe jelilerińiz arqyly taratyńyz. Osy alapat sý tasqynynan shyǵý úshin Qazaqstan halqy bizdiń kómegimizge óte muqtaj. Osy qıyn kezeńde meıirimdilik pen janashyrlyq tanytqanyńyz úshin rahmet», - dep jazdy Qazaq center uıymy.