Chıkagoda meksıkalyq «Golos» shoýynyń qatysýshysy qaza tapty
ASTANA. QazAqparat - Amerıkandyq Chıkago qalasynda (Illınoıs shtaty) meksıkandyq «Golos» shoýynyń qatysýshysy Alehandro «Djano» Fýenteske (Alejandro «Jano» Fuentes) shabýyl jasalyp, ol qaza tapty. Bul týraly Lenta.ru Associated Press agenttigine silteme jasap habarlady.
Oqıǵa 17 maýsymda, oryndaýshynyń týǵan kúninde oryn aldy. Fýentes dostarymen avtomobılmen toılaýǵa barmaq bolǵan. Qarýlanǵan qaskóı kelip, ánshiniń kólikten shyǵýyn talap etken. Oryndaýshy bas tartqan soń qylmysker 45 jastaǵy er adamǵa birneshe ret oq atyp, izin sýytty, dep habarlady NBC News.
Fýentes basynan úsh jerden jaraqat aldy. Aýrýhanaǵa jetkizilgennen keıin qaıtys boldy.
Quqyq qorǵaý organdary birneshe nusqany qarastyryp jatyr. Sonyń ishinde tonaýshylyq qylmysy bolýy da múmkin. Ázirge kúdikti kim ekeni belgisiz.
