Chevron «Lýkoıldyń» sheteldik aktıvterin satyp alý múmkindigin qarastyryp otyr

ASTANA. KAZINFORM – Chevron kompanııasy AQSh sanktsııa salǵan reseılik munaı óndirýshimen kelissóz júrgizýge múmkindik beretin lıtsenzııa bergennen keıin «Lýkoıldyń» sheteldik aktıvteriniń bir bóligin satyp alý múmkindigin zerttep jatyr, dep habarlaıdy MSN.

21 qarashada AQSh-tyń reseılik kompanııaǵa qarsy sanktsııalary tolyq kúshine enedi. Alaıda juma kúni AQSh Qarjy mınıstrligi amerıkalyq kompanııalarǵa 13 jeltoqsanǵa deıin «Lýkoıldyń» sheteldik aktıvterin satyp alýyn talqylaýǵa múmkindik beretin lıtsenzııa berdi.

Reuters derekkózderiniń málimetinshe, Chevron «Lýkoıldyń» óz múddelerine saı keletin aktıvterin satyp alýdy qarastyryp jatyr.

Negizgi aktıvterdiń biri – «Lýkoıldyń» Iraktyń «Batys Kýrna-2» munaı ken ornyndaǵy 75% úlesi. Buǵan deıin Irakta Chevron kompanııasynyń múmkindikteri shekteýli edi, biraq 2025 jyldyń tamyz aıynda Nasırııa jáne Balad ken oryndaryn ıgerý týraly kelisimderge qol qoıý arqyly qatysýyn keńeıtti.

Irak úkimeti AQSh pen Ulybrıtanııanyń sanktsııalaryna sáıkes Reseı munaı kompanııasyna tólemderdi toqtatqannan keıin «Lýkoıl» ótken aptada «Batys Kýrna-2» ken ornynda fors-majorlyq jaǵdaı týraly jarııalady.

Irak sheneýnikteriniń atap ótýinshe, «Lýkoıl» holdıngine kem degende úsh kompanııa – bir qytaılyq jáne eki batystyq qyzyǵýshylyq tanytyp otyr.

Buǵan deıin «Lýkoıl» sheteldik aktıvterin satýǵa keliskenin jazǵan edik.