Chevron qazaqstandyq munaıdy Azııaǵa Qyzyl teńizdi aınalyp ótip jóneltedi - BAQ

ASTANA. KAZINFORM – Chevron kompanııasy qazaqstandyq CPC Blend munaıyn Azııaǵa ıemendik hýsıtterdiń shabýylyna jol bermeý úshin Qyzyl teńiz arqyly emes, Qaıyrly úmit múıisi arqyly Afrıkany aınalyp ótip jóneltedi, dep habarlaıdy Reuters.

Kóptegen kompanııalar hýsıtterdiń teńiz kemelerine shabýyly kúsheıgen saıyn Eýropa men Azııa arasyndaǵy eń qysqa teńiz joly – Qyzyl teńiz men Sýets kanalynan aınalyp ótip, baǵyttaryn ózgertip júr.

Qyzyl teńizdegi shabýyldar men tasymaldaý shyǵyndary CPC Blend-tiń Azııaǵa jetkizilimin shekteıtin kórinedi.

CPC Blend munaıy ıÝjnaıa Ozereevka kentindegi (Novorossıısk qalasy) termınalǵa deıin tasymaldanyp, onda álemdik naryqqa jóneltý úshin tankerlerge tıeledi. Azııaǵa ádettegi baǵdar Qara teńizden Jerorta teńizine, odan keıin Sýets kanaly arqyly ońtústikke ótedi.

Jerorta teńizi arqyly batysqa, sodan keıin Afrıkany aınalyp ońtústikke qaraı júretin jańa baǵyt shyǵyndar jáne jetkizý ýaqytyn arttyryp otyr.

CPC Blend munaıynyń basym bóligi Qazaqstannan, bir bóligi reseılik kompanııalardan keledi. Derekkózder men LSEG derekterine sáıkes, reseılik CPC Blend munaıy Qyzyl teńiz arqyly tasymaldanyp otyr. 

Qazaqstandyq CPC Blend munaıynyń iri eksporttaýshysy «Teńizshevroıl» naqty kemelerge qatysty túsinikteme berýden bas tartty.

«Chevron Qyzyl teńiz men Taıaý Shyǵystaǵy baǵyttardyń qaýipsizdigin belsendi túrde baǵalaýyn jalǵastyryp, sońǵy oqıǵalardy negizge alyp sheshim qabyldaıdy», - dedi kompanııadan.