Chevron basshysy: Qazaqstanmen seriktestik otyz jyldan beri tabysty jalǵasyp keledi

NЬıÝ-IORK. KAZINFORM — Chevron korporatsııasy dırektorlar keńesiniń tóraǵasy jáne bas atqarýshy dırektory Maıkl Ýırt Memleket basshysymen ótken kezdesýde Qazaqstan ekonomıkasyna ınvestıtsııa salý múmkindikteri talqylanǵanyn aıtty.

— Búgin biz Prezıdentpen nátıjeli áńgime júrgizdik. Áńgime Astanada ótken aldyńǵy kezdesýimizden órbidi. Kún tártibinde óndiristi keńeıtý, energetıka salasy men Qazaqstan ekonomıkasyna ınvestıtsııa salý múmkindikteri talqylandy. Sondaı-aq, energııa resýrstaryn Eýropaǵa jáne jalpy álemdik naryqtarǵa jetkizý máselelerin qarastyrdyq. Aıta keteıin, bizdiń seriktestigimiz otyz jyldan astam ýaqyttan beri jalǵasyp keledi jáne ol aıtarlyqtaı ekonomıkalyq ósimge, sondaı-aq jańa jumys oryndarynyń qurylýyna yqpal etti. Bul uzaq merzimdi ári bolashaǵy zor yntymaqtastyqty odan ári damytý úshin mańyzdy, — dedi Maıkl Ýırt. 

Aıta ketelik Qasym-Jomart Toqaev Chevron korporatsııasy dırektorlar keńesiniń tóraǵasy jáne bas atqarýshy dırektory Maıkl Ýırtti qabyldaǵan edi.