Chevrolet Hyundai-di qýyp jetti: qazaqstandyqtar qandaı kólikterdi jıi satyp alady
ASTANA. KAZINFORM — Qazaqstannyń avtokólik naryǵynda báseke kúsheıip, burynǵy kóshbasshylardyń pozıtsııasy ózgere bastady. Hyundai satylym boıynsha áli de birinshi orynda turǵanmen, Chevrolet onymen aradaǵy aıyrmashylyqty 251 kólikke deıin qysqartty. Al qytaılyq Changan bir jylda satylymyn 92,6% arttyryp, úzdik úshtikke jaqyndaı tústi. 10 aıdyń kórsetkishteri qazaqstandyqtardyń kólik tańdaýynda qandaı ózgerister bolyp jatqanyn ańǵartady.
Chevrolet Hyundai-di qýyp jetti
Qazaqstan Avtokólik odaǵynyń baspasóz qyzmeti taratqan málimetke súıensek, Qazaqstandaǵy resmı dılerler bıylǵy qazan aıynda 21 912 jańa avtokólik satqan. Bul jyl basynan bergi eń joǵary aılyq kórsetkish. Byltyrǵy qazanmen salystyrǵanda satylym 8,5%, al bıylǵy qyrkúıekpen salystyrǵanda 13,1% artqan.
Qazan aıynyń qorytyndysy boıynsha Chevrolet 4 174 kólik satyp, brendter reıtınginde birinshi orynǵa shyqty. Bir jylda onyń satylymy 49% ósken. Ekinshi orynda 3 200 kólik satqan Hyundai tur. Alaıda koreıalyq brendtiń satylymy ótken jyldyń qazanymen salystyrǵanda 24,4% tómendegen. Úshinshi orynǵa 2 350 kólik satqan Kia jaıǵasty. Odan keıin Changan (1 923) men Chery (1 656) keledi.
Brendter arasyndaǵy báseke bir aılyq kórsetkishpen ǵana shektelmeıdi. Qańtar-qazan qorytyndysy boıynsha Hyundai áli de birinshi orynda bolǵanmen, Chevrolet ony qýyp jetýge jaqyn. On aıda Hyundai 30 697 kólik satsa, Chevrolet kórsetkishi 30 446 danaǵa jetken. Eki brendtiń arasyndaǵy aıyrmashylyq nebári 251 kólik. Bir jyl burynǵy kórsetkishtermen salystyrǵanda olardyń jaǵdaıy qarama-qarsy baǵytta ózgergen: Hyundai satylymy 22,9% tómendese, Chevrolet 18,4% ósim kórsetken.
Changan satylymyn eki ese kóbeıtti
Qytaı brendteriniń arasynda Changan erekshe qarqynmen ósip keledi. On aıda 17 568 kólik satyp, satylymyn byltyrǵy sáıkes kezeńmen salystyrǵanda 92,6% arttyrǵan. Osy nátıjemen ol jalpy brendter reıtınginde tórtinshi orynǵa kóterildi. Chery 13 650 kólikpen besinshi, Haval 10 898 kólikpen altynshy orynda tur. Jetour 9 561, JAC 7 266, Geely 5 871 kólik satqan.
Qytaılyq brendterdiń bári birdeı ósim kórsetip otyrǵan joq. Changan, Chery jáne Haval satylymyn arttyrsa, Jetour kórsetkishi 18,2%, Geely satylymy 28,3% tómendegen. Soǵan qaramastan, reıtıngtegi Changan, Chery, Haval, Jetour, JAC jáne Geely markalarynyń jıyntyq satylymy 64 814 kólikke jetti. Bul on aıdaǵy jalpy satylymnyń shamamen 34,5%-y, ıaǵnı qytaılyq alty brendtiń ózi naryqtyń úshten birinen astamyn ıelenip otyr.
Mufasa Tucson-nyń aldyna shyqty
Hyundai brendiniń ishinde de modelder arasyndaǵy báseke kúsheıgen. Naqty aıtsaq, eki tanymal model arasynda tartys júrip jatyr. Qazanda Hyundai Mufasa 1 446 danamen satylyp, Tucson-dy yǵystyrdy. Tucson-nyń aılyq nátıjesi — 864 kólik, ıaǵnı Mufasa bir aıda Tucson-nan 67,4% kóp satylǵan.
Toyota-nyń saýdasy báseńdeı tústi
Jalpy, Qazaqstannyń jańa avtokólik naryǵy bıylǵy on aıda 3,3% ósti. Osy kezeńde resmı dılerler 187 698 jeńil jáne kommertsııalyq kólik satqan. Alaıda naryqtyń jalpy ósimi brendter arasynda birkelki bólinbegen. Hyundai, Jetour, Geely jáne Toyota satylymy tómendese, Chevrolet, Changan, Chery men Haval kórsetkishterin jaqsartqan.
Qazaqstanda qurastyrylatyn kólikterdiń kólemi ósip, ımportpen aradaǵy aıyrmashylyq qysqaryp keledi. Onyń ishinde qytaılyq brendterdiń bir bóligi Qazaqstanda qurastyrylyp jatyr.
Resmı statıstıkaǵa sensek, 2026 jyldyń qańtar-tamyz aılarynda Qazaqstanda 117 170 jeńil avtokólik óqurastyrylǵan. Bul ótken jyldyń sáıkes kezeńimen salystyrǵanda 34,2% kóp. Al osy segiz aıda elge 116 230 jeńil avtomobıl ımporttalǵan. Import kólemi bir jylda 26,9% azaıǵan. Sóıtip, otandyq óndiris ımporttan 940 kólikke asyp tústi.
Bul eki kórsetkishtiń araqatynasy da ózgergenin kórsetedi. Segiz aıdaǵy óndiris pen ımporttyń jıyntyq kóleminde Qazaqstanda qurastyrylǵan kólikterdiń úlesi shamamen 50,2%, ımporttyń úlesi 49,8% boldy. Bul esepte eksport pen qoımadaǵy qaldyqtardy eskerilmegenin eskerý kerek.
Ulttyq statıstıka bıýrosynyń dereginshe, 2026 jylǵy qańtar-qyrkúıekte Qazaqstanda 136 548 jeńil avtokólik shyǵarylǵan. Bul ótken jyldyń sáıkes kezeńinen 38% artyq. Elde 12 kásiporyn avtomobıl óndirýmen aınalysady. Óndiristiń 50,5%-y Qostanaı oblysyna, 49,5%-y Almaty qalasyna tıesili.
Qyzyǵy, otandyq óndiriste de qytaılyq brendterdiń úlesi artyp keledi. Qazaqstan Avtokólik odaǵynyń málimetinshe, toǵyz aıda Changan-nyń 15 148, Chery-diń 12 593, Haval-dyń 10 955 kóligi qurastyrylǵan. Úsheýiniń jıyntyq óndirisi 38 696 avtokólikke jetken.
Salystyrý úshin, osy kezeńde Chevrolet-tiń 29 555, Hyundai-diń 27 275 kóligi óndirilgen, ıaǵnı Changan, Chery jáne Haval-dyń Qazaqstandaǵy zaýyttarda qurastyrylǵan kólikteriniń jıyntyq kólemi Chevrolet nemese Hyundai-diń jeke óndirisinen joǵary.
Al ımport qurylymynda Qytaıdyń úlesi basym. 2026 jylǵy qańtar-shildede Qazaqstanǵa 153 619 jeńil avtomobıl ákelingen. Onyń 120 142-si Qytaıdan jetkizilgen. Bul jalpy ımporttyń shamamen 78%-y. Qytaıdan ákelingen kólikterdiń quny 489,1 mln dollar bolǵan.
Baǵa básekesi
Avtokólik naryǵyndaǵy básekeniń kúsheıýi baǵaǵa da áser etip otyr. Kolesa.kz portalynyń zertteýi boıynsha, 2026 jyldyń toǵyz aıynda Changan CS55 Plus modeliniń ortasha baǵasy 12,62 mln teńgeden 10,28 mln teńgege deıin tómendegen. Bul — 18,5% nemese shamamen 2,34 mln teńge. Haval M6 baǵasy 18,57%, Haval Jolion 10,92% arzandaǵan.
Al Kia Sportage 23,65%, Hyundai Mufasa 7,68%, Chevrolet Cobalt 9,24% arzandaǵan. Hyundai Tucson baǵasy is júzinde ózgerissiz qalǵan. Hyundai Mufasa-nyń qazan aıynda alǵa shyǵýyna osy da áser etse kerek.
Al Ulttyq statıstıka bıýrosynyń málimetinshe, qazan aıynda Qazaqstanda qurastyrylǵan jeńil avtomobılderdiń baǵasy bir jylda 17,3% tómendegen. Іshki ister mınıstrliginiń kólik quraldaryn tirkeý derekteri negizdelgen resmı esepke sensek (Ulttyq statıtsıka bıýrosy), Qazaqstan kólik parkiniń negizgi bóligin, áli de bolsa, eski mashınalar alyp tur. Eldegi jeńil avtomobılderdiń 42,2%-y 20 jyldan astam minilgen.