Chernogorııa Prezıdenti men Oljas Bektenov birqatar máseleni talqylady
ASTANA.KAZINFORM - Kezdesý barysynda Qazaqstan Premer-mınıstri Oljas Bektenov pen Chernogorııa Prezıdenti ıAkov Mılatovıch Qazaqstan men Chernogorııa prezıdentteriniń kelissózderi nátıjesinde qol jetkizilgen ýaǵdalastyqtardy júzege asyrý máselelerin qarady. Bul týraly QR Úkimetiniń baspasóz qyzmeti habarlady.
– Búgin Siz Qazaqstan Prezıdenti Qasym-Jomart Toqaevpen mazmundy ári syndarly kelissózder júrgizdińiz. Sizdiń saparyńyz Qazaqstan men Chernogorııa arasyndaǵy qatynastardyń jańa kezeńin ashatynyna senimdimin. Qazaqstan Úkimeti joǵary deńgeıde qol jetkizilgen barlyq ýaǵdalastyqtyń júzege asyrylýyn baqylaýyna alady, — dep atap ótti Premer-mınıstr.
Ekijaqty taýar aınalymynyń qazirgi deńgeıi yntymaqtastyqtyń áleýetin tolyq asha almaı otyrǵany atalyp ótti.
– Bizdiń elderdiń úkimetteri aramyzdaǵy qarym-qatynasty odan ári damytý úshin irgeli quqyqtyq negiz bolatyn birqatar ekijaqty kelisim jobalaryn ázirlep jatyr. Bul jerde áńgime ekonomıkalyq yntymaqtastyq, ádilet salasyndaǵy áriptestik, sondaı-aq tsıfrlandyrý salasyna qatysty ózara is-qımyl turǵysyndaǵy kelisimder týraly bolyp otyr. Biz Qazaqstannyń tsıfrlyq transformatsııa salasyndaǵy jetistikterin joǵary baǵalaımyz, ári sizdiń eldiń osy baǵyttaǵy qundy tájirıbesin qabyldaı alamyz dep sanaımyn, — dep atap ótti ıAkov Mılatovıch.
Eki eldiń prezıdentteri belgilegen mindetter aıasynda saýda, kólik jáne logıstıka, aýyl sharýashylyǵy, tsıfrlyq tehnologııalar, týrızm, bilim berý salalaryndaǵy perspektıvaly jobalarǵa nazar aýdaryldy.
Agroónerkásip kesheninde Qazaqstannyń Chernogorııa naryǵyna aýyl sharýashylyǵy ónimderin, onyń ishinde un, bıdaı, maıly daqyldar men tereń óńdelgen ónimderdi eksporttaýǵa daıyn ekendigi atalyp ótti. Sondaı-aq aýyl sharýashylyǵy ǵylymyn, tuqym sharýashylyǵyn, bıotehnologııalardy, mal sharýashylyǵy men aýyl sharýashylyǵyn júrgizýdiń ózge de ornyqty ádisterin damytý salasyndaǵy ózara is-qımyl máseleleri talqylandy.
Kólik-logıstıka salasynda Qazaqstannyń Eýropa men Azııa arasyndaǵy basty tranzıttik kópir retindegi róli ataldy. Transkaspıı halyqaralyq kólik baǵyty boıynsha tasymaldaý kólemi ótken jyly 36%-dan astam ósip, 77 myń JFE konteınerine jetti. Chernogorııanyń strategııalyq turǵydan tıimdi ornalasýyn jáne onyń Adrıatıkalyq teńizge qoljetimdilikti qamtamasyz etýge qanshalyqty úles qosatynyn eskere otyryp, kezdesýge qatysýshylar saýda jáne ınvestıtsııalyq baılanystardy keńeıtýdiń keń múmkindikteri baryn atap ótti. Sonymen qatar THKB-nyń qýatyn Bar portymen juptastyrý jaıy talqylandy. Bul Ońtústik jáne Ortalyq Eýropaǵa jańa mýltımodaldy dáliz qurýǵa múmkindik beredi.
Tsıfrlandyrý jáne jasandy ıntellekt salasyndaǵy yntymaqtastyq perspektıvalaryna nazar aýdaryldy. Qazaqstan memlekettik qyzmetterdi tsıfrlandyrý boıynsha álemdik kóshbasshylardyń qataryna kiredi, olardyń 90%-dan astamy búginde onlaın rejımde qoljetimdi. Bul baǵytta birlesken GovTech jáne JI-bastamalaryn qurý arqyly tsıfrlyq transformatsııa, JI, memlekettik basqarý men ınnovatsııalar salasyndaǵy áriptestikti keńeıtý boıynsha eleýli áleýet bar.
Oljas Bektenov Chernogorııa delegatsııasyna eldegi qalyptasqan ınvestıtsııalyq klımat týraly aqparat berdi. Negizgi sharalardyń qatarynda 2030 jylǵa deıingi ınvestıtsııalyq saıasat tujyrymdamasyn jańartý, ınvestıtsııalyq shtabtyń jumysy jáne Bas prokýratýra janyndaǵy salalyq komıtet qyzmeti sheńberinde ınvestorlardyń quqyqtaryn qorǵaýdy kúsheıtý, sheteldik ınvestorlar men joǵary bilikti mamandar úshin «Altyn Visa» jańa arnaıy vızalyq rejımin engizý bar.
Premer-mınıstr Oljas Bektenov Úkimettiń joǵary deńgeıdegi kelissózder barysynda qol jetkizilgen ýaǵdalastyqtardy is júzine asyrýǵa tolyq daıyn ekenin rastady.
Aıta keteıik, Chernogorııa Qazaqstannyń tsıfrlandyrý salasyndaǵy ozyq tájirıbesin úırenýge nıetti.
