Chernogorııa orman órtterine baılanysty halyqaralyq kómek surady
ASTANA. KAZINFORM — Chernogorııa el aýmaǵynda órship turǵan orman órtterine baılanysty kórshi elder men halyqaralyq qaýymdastyqtan kómek suraýǵa májbúr boldy, dep habarlaıdy Anadoly.
Qazirgi tańda órt el astanasy Podgorıtsa, sondaı-aq Nıkshıch, Bıelo-Pole, Chane jáne Býlıarıtsa qalalarynyń mańynda sóndirilip jatyr.
Jergilikti BAQ-tyń habarlaýynsha, qatty jeldiń saldarynan taralyp jatqan órt keıbir turǵyn aýdandarǵa jaqyndap qalǵan.
Chernogorııanyń Іshki ister mınıstrligi órt oshaqtary Podgorıtsa, Býdva, Bar, Nıkshıch, Shavnık jáne Bıelo-Pole qalalarynda áli de jalǵasyp jatqanyn málimdedi.
Sonymen qatar Podgorıtsa úkimeti NATO aıasynda kórshi elderden kómek suraǵanyn habarlady.
Serbııanyń Іshki ister mınıstrligi Chernogorııadaǵy órtti sóndirý úshin tikushaq jiberilgenin málimdedi.
Ulttyq BAQ-tyń dereginshe, Horvatııa da órtpen kúresý úshin arnaıy órt sóndirý ushaǵyn jóneltken.
Qazir Chernogorııada qyzyl deńgeıdegi qaýip jarııalandy. Bul – keshe bastalǵan shekten tys joǵary temperatýralarǵa baılanysty.
Balqan elderi orman órtterimen jáne aptap ystyqpen kúresip jatyr
Horvatııada Splıt qalasynyń mańynda jaqynda tutanǵan aýqymdy orman órti 250 gektar jerdi joıyp jibergen. Alaıda qazir baqylaýǵa alynǵan.
Kosovonyń Tótenshe jaǵdaılar agenttiginiń jazbasha málimdemesine sáıkes, 12 tamyzda saǵat 14:00 men 20:00 aralyǵynda el aýmaǵynda 51 órt tirkelgen. Onyń 32-si baqylaýǵa alynyp, 19 órtti sóndirý jumystary jalǵasyp jatyr.
Albanııanyń Azamattyq qorǵanys ulttyq agenttigi (AKMC) sońǵy 24 saǵat ishinde el aýmaǵynda 50 orman órti tirkelgenin, olardyń 19-y áli de sóndirilmegenin habarlady.
AKMC málimetinshe, órt sóndirý jumystaryna 82 órt sóndirý kóligi men 1080 adam jumyldyrylǵan.
Albanııalyq Geologııalyq ǵylymdar ınstıtýty Shkoder, Leja jáne Elbasan provıntsııalarynda jáne jalpy el boıynsha órt shyǵý qaýpi óte joǵary ekenin eskertti.
Aýa temperatýrasy 41 gradýsqa deıin kóteriledi dep kútilip otyr. Azamattarǵa saq bolýǵa jáne órt baıqalǵan jaǵdaıda jergilikti bılikke dereý habarlaý kerek ekeni eskertildi.
Aptap ystyqqa baılanysty eskertýler Horvatııa, Bosnııa jáne Gertsegovına men Serbııada da jarııalanǵan.
Budan buryn Germanııada aptap ystyqqa baılanysty kondıtsıoner óndirisi eki ese artqany málim boldy.