Chernobyl apatyn joıýǵa qatysqan qazaqstandyq týraly derekti fılm shyqty
ALMATY. QazAqparat - Almatyda jańa derekti fılmniń tusaýkeseri ótti, dep habarlaıdy QazAqparat tilshisi.
Almatyda QR Mádenıet jáne sport mınıstrligi jáne Qazaqstan Respýblıkasynyń Tuńǵysh Prezıdenti - Elbasy qorynyń qoldaýymen uıymdastyrylǵan Qazaq derekti kınosy kúnderi sheńberinde «Patsany zovýt ego Batıa» atty derekti fılmniń tusaýkeseri ótti. Fılm rejısseri - Aınur Ahmetjanova.
Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen kınotýyndy zapastaǵy polkovnık, Aýǵan soǵysy ardageri, Chernobyl AES apaty zardabyn joıý jumystaryna belsene qatysqan, «Legıon» áskerı-patrıottyq klýbynyń negizin qalaýshy ári jetekshisi Batýr Abdýsalamovtyń ómiri men qyzmeti týraly baıandaıdy.
- Bul Batýr aǵa týraly túsirgen ekinshi fılmim. Eń alǵash ret osy kisi týraly 7 jyl buryn túsirdim, ol QR Tuńǵysh Prezıdenti-Elbasy qorynyń qoldaýymen túsirilgen dıplomdyq jumys edi. Qansha fılm túsirsem de, ózimniń alǵysymdy jetkize alar emespin. Mansap qýmaı, ataq-dańq úshin emes, sanaly urpaq tárbıeleýde ter tógip júrgen osyndaı azamattardy bilip júrýimiz qajet dep oılaımyn. Olaı deıtinim, Batýr aǵa 30 jylǵa jýyq ár jastaǵy túrli ult ókilderinen jınalǵan balalardy tegin jattyqtyryp júr. Bul balalar kóshe kezip nemese kompıýterlik klýbtardy jaǵalamaı, óz ýaqyttaryn Batýr aǵanyń jattyqtyrý zalynda ótkizetinderi qýantady. Jattyǵý jumystary qolaısyz jaǵdaıdarda - jertóle men mektep aýlalarynda ótse de, balalar úlken qyzyǵýshylyqpen kelip qatysady. Tipti mektep bitirip, ınstıtýt támamdaǵan jastar aǵaılarymen áli kúnge deıin habarlasyp turady, - dedi fılmniń rejısseri Aınur Ahmetjanova.
Fılmniń túsirý jumystary Almaty jáne Almaty oblysynda júrgizildi. Fılmde rejısser ár jyldary ózi túsirgen beıne materıaldar, sonymen qatar basty keıipkerdiń jeke muraǵaty paıdalanyldy.
- Men «Legıon» klýbyn burynnan jaqsy bilemin. Aralasyp júrgenimizge 20 jyldaı ýaqyt boldy. Batýr aǵany ákemdeı kóremin. Fılmniń túsirý toby da oǵan qatty baýyr basyp ketti, óıtkeni ekinshi fılmniń túsirý toby aıtarlyqtaı ózgermegen, - dedi rejısser. 
