Chernobyl apatyn alǵashqy bolyp sýretke túsirgen fotograf qaza tapty
ASTANA. QazAqparat - Tarıhtaǵy qaıǵyly qasiretti sýretke túsirýden radıatsııalyq sáýlelenýge ushyraǵan fotograf 29 jyldan soń kólik apatynda kóz jumdy, dep habarlady www.24.kz.
1986 jyly 26 sáýirde Chernobyl atom stansasynda bolǵan apatty eń birinshi bolyp, obektıvke alǵan fotograf Igor Kostın 8 maýsymda Kıev túbindegi Hlepcha selosy mańynda 79 jasynda kólik apatynan qaza tapty. Bul týraly onyń jubaıy Alla Kostınaǵa silteme jasaǵan álemdik BAQ habarlady.
Apatty aımaqtan ushaqpen túsirilgen sýretterdiń barlyǵyn radıatsııa jalmap, tek osy tórtinshi energobloktyń sýreti tutas qalǵan eken. Aqyry osy sýret apatty sıpattaıtyn negizgi beınege aınaldy. Keıinnen Kostın qalany tazalaý operatsııalary men apattan soń týylǵan naýqas balalardy sýretke túsirý úshin Chernobyl aımaǵyna birneshe ret bardy. Ol osy bir kózsiz erligi úshin fotojýrnalıstıka salasyndaǵy eń bedeldi World Press Photo júldesiniń laýreaty atandy.
Qaýipti qyzmetpen aınalysý kezinde Kostın 150 rentgen mólsherde sáýlelenýge shaldyqty.
