Chernobyl AES-niń qaptamasy dron soqqysynan keıin radıatsııadan qorǵaýyn toqtatty

ASTANA. KAZINFORM — 2025 jylǵy aqpan aıynda dronnyń zaqymdaýy saldarynan Chernobyl atom elektr stantsııasynyń qorǵaýshy qaptamasy (sarkofag) radıatsııany ustap turý múmkindiginen aıyryldy, dep habarlaıdy DW basylymy.

Halyqaralyq atom energııasy agenttigi (MAGATE) habarlaǵandaı, qaýipsizdikti qamtamasyz etý úshin sarkofagty tolyq qalpyna keltirý qajet. Dron zaqymdaǵannan keıin Chernobyl AES-tiń qorǵaýshy qabyǵy negizgi fýnktsııalaryn oryndaı almaı qaldy.

Agenttik bas dırektory Rafael Grossıdiń sózinshe, tekserý «qorǵaýshy qabyq óziniń negizgi qaýipsizdik fýnktsııalaryn, sonyń ishinde radıatsııany ustap turý qabiletin joǵaltqanyn» rastaǵan.

Degenmen mamandar negizgi qurylymdar men monıtorıng júıelerine uzaq merzimdi zaqym kelmegenin anyqtaǵan. Grossı birinshi jóndeý jumystary júrgizilgenin, biraq uzaq merzimdi ıadrolyq qaýipsizdikti qamtamasyz etý úshin sarkofagty tolyq qalpyna keltirý qajet ekenin atap ótken.

Qorǵaýshy qabyq Chernobyl AES-tiń toqtatylǵan reaktorlarynyń ústine atom apatynan keıin radıoaktıvti materıaldardyń odan ári taralýyn boldyrmaý maqsatynda salynǵan. Halyqaralyq qaýymdastyq osy jobany júzege asyrýǵa 2,2 mıllıard evro jınaǵan.

Osy jyldyń aqpan aıynda BUU habarlaǵandaı, stantsııaǵa qýatty soǵys drony shabýyl jasaǵan. MAGATE derekterine sáıkes, dron soqqysy qorǵaýshy arkanyń syrtqy qabyǵyn alaýlaǵan órtke orap, onyń lastanýdy ustap turý jáne syrtqy áserden qorǵaý jobalyq parametrlerin buzǵan.

Eske sala keteıik, Brıýssel áýejaıy áýe keńistiginde dron baıqalǵannan keıin ýaqytsha jabylǵan edi. 

Sondaı-aq jýyrda eldegi AES-terge qajet strategııalyq otyn qory qurylatynyn jazdyq.