Chendýda qazaq ashanasyn ashqan jas otbasy - sheteldegi qazaq baspasózi
«KAZINFORM» HAA sheteldegi qazaq tilinde taraıtyn aqparat kózderine aptalyq sholýyn usynady.
Stambýl halyq sanymen 131 eldi artta qaldyrdy – «TRT»
Túrkııa Statıstıka mekemesi men BUU Halyq qonystaný qorynyń derekterine qaraǵanda, Stambýldyń halyq sany 2023 jyly aldynǵy jylmen salystyrǵanda 252 myń 72 adam azaıyp, 15 mıllıon 655 myń 924 bolǵanyna qaramastan halyq sanymen álemdegi 131 eldi artta qaldyrdy, dep habarlady Túrkııa Radıo Televızııa portaly.
Túrkııalyq BAQ-tyń dereginshe, atalǵan qalada Túrkııa halqynyń 18,34 paıyzy turady. Olardyń 7,8 mıllıony – er adamdar, 7,84 mıllıony – áıel azamattar.
«Eýropanyń halqy eń kóp qalasy bolyp sanalatyn Stambýl 131 elden de asyp túsedi. Portýgalııa men Vengrııa 10,2 mıllıon, Týnıs 12,5 mıllıon, Belgııa 11,7 mıllıon halqymen Stambýldyń artynda qalǵan», dep jazady «TRT».
Kóshpendiler oıyny: Resmı túrde sporttyq saıystar túri bekitildi - «Halyq gazeti»
2024 jyly 8-14 qyrkúıek aralyǵynda Astana qalasynda uıymdastyrylatyn V Dúnıejúzilik kóshpendiler oıyndarynyń sporttyq saıystary resmı túrde bekitildi.
QR Týrızm jáne Sport mınıstrligi málim etkendeı, Dúnıejúzilik kóshpendiler oıynynda sporttyń 20 túrinen kil myqtylar anyqtalady.
Bul týraly qytaılyq «Halyq gazeti» basylymy habarlaıdy.
Atap aıtsaq, asyq atý, ordo, arqan tartys, báıge, kókpar, aýdaryspaq, teńge ilý, qazaq kúresi, alysh, kýrash, ashyrtmaly aba gıýreshı, ssırym, mas-restlıng, Powerfull nomad (kúshtilerdiń saıysy), toǵyzqumalaq, mangala, ovarı, dástúrli sadaq atý, jamby atý, qusbegilikten saıystar ótedi.
Sonymen qatar, 10 kórneki sport saıysynan jarystar ótkizý josparlanǵan.
Kóshpendiler oıyndarynyń saltanatty ashylý rásimi «Astana Arena» stadıonynda ótedi.
Ózbekstan men Qazaqstan Premer-Mınıstrleri telefon arqyly sóılesti - «ÓzA»
6 aqpanda Ózbekstan Respýblıkasynyń Premer-Mınıstri Abdýlla Arıpov Qazaqstan Respýblıkasynyń Premer-Mınıstri Oljas Bektenovpen telefon arqyly sóılesti, dep habarlaıdy «ÓzA» aqparat agenttigi.
Atalǵan basylymnyń dereginshe, suhbat basynda Ózbekstan Premer-Mınıstri Oljas Bektenovti Qazaqstannyń Premer-Mınıstri laýazymyna taǵaıyndalǵanymen quttyqtaǵan.
«Sondaı-aq Memleket basshylary Ózbekstan-Qazaqstan strategııalyq seriktestigi men odaqtastyq qatynastaryn odan ári damytý boıynsha úkimetterdiń aldyna qoıylǵan mańyzdy mindetter tyǵyz yntymaqtastyqta júzege asatynyna senim bildirdi», dep jazdy ózbekstandyq BAQ.
Sondaı-aq, buǵan deıin Ózbekstan Premer-Mınıstri qazaqstandyq áriptesine bul qyzmetke bekitilýine baılanysty quttyqtaý hatyn da joldaǵan eken.
Sondaı-aq, osy aptada «ÓzA»-da «Ózbekstan pııaz eksporty boıynsha top-5 eldiń qataryna endi» degen taqyryptaǵy aqparat jarııalandy.
Basylymnyń málimetinshe, Ózbekstan pııaz eksporty boıynsha álemdegi eń iri 5 eksporttaýshynyń qataryna kirgen.
ÓR Aýyl sharýashylyǵy mınıstrliginiń habarlaýynsha, ótken maýsymnyń qorytyndysy boıynsha Ózbekstan jylyna 250 myń tonnaǵa deıin pııaz eksporttaıtyn álemdegi 10 eldiń qataryna endi.
Mamandar bıylǵy jyldyń sońyna deıin Ózbekstanda pııaz eksporty rekordtyq kórsetkishke jetip, alǵash ret 300 myń tonnadan asady dep boljap otyr.
Chendýda qazaq ashanasyn ashqan jas otbasy bar - CNR
Qytaıdyń eń iri megapolıstarynyń biri Chendý qalasynda qazaqtyń ulttyq taǵamdaryn daıyndaıtyn ashana bar, dep habarlaıdy Qytaıdyń «Ortalyq halyq radıosy».
Atalǵan basylymnyń dereginshe, ashananyń qojaıyny - jas jubaılar Qasen men Juldyz. Olardyń Chendý qalasyna qonys aýdaryp, kásip istep jatqandaryna 3 jyldan asty. Qasen men Juldyz alǵash ret Chendý qalasyna demalýǵa qydyryp keledi. Atalǵan qalanyń erekshe tartymdylyǵy olardy ózine baýraıdy. Jas jubaılar bul qalada barlyǵy bar bolǵanymen, qazaqtyń ashanasy joq ekenin baıqaıdy. Olar osy olqylyqtyń ornyn ózimiz toltyrsaq degen oıǵa keledi. Sóıtip ekeýi jumystaryn bastap ketedi. Buryn kásiptiń bul túrimen aınalysyp kórmese de, az ýaqyttan keıin qazaqtyń ulttyq taǵamdary birge basqa da tamaqtardy jasaýdy úırenip alady. Olar qazirgi ýaqytta astyń qandaı túrleri bolsa da jasaı alatyn bolǵan. Juldyzdyń aıtýynsha, beshbarmaq ıaǵnı et asý sekildi ashananyń negizgi tamaqtaryn Qasen ázirleıdi. Al baýyrsaq, laǵman sııaqty as túrlerin Juldyzdyń ózi daıyndaıdy eken. Olardyń bul ashanasynda qazaqtyń ártúrli ulttyq as túrlerimen birge Eýropa taǵamdary da daıyndalady.
Aıta keteıik, 20 mıllıonnan astam halqy bar Chendý qalasy - Qytaıdyń Sychýan provıntsııasynyń ortalyǵy. Bul Qytaıdaǵy halqy eń kóp tórtinshi iri qala.
2000-ǵa jýyq maly bar qandasymyz memlekettik marapat aldy - Janadauir.com
Mońǵolııanyń Delúún aýdanynda turatyn Ómirbek Soltaqanuly atty qandasymyz «Memlekettik sańlaq malshy» atandy.
«Janadauir» basylymnyń málimetine súıensek, Delúún sumyn (aýdany), 7-baq turǵyny Ómirbek mal sharýashylyǵymen uzaq ýaqyttan beri aınalysady. Ótken jyly onyń malynyń jalpy sany 2 myńǵa jýyqtap, jaqynda «Memlekettik sańlaq malshy» ataǵyn ıelengen.
Onyń ákesi Soltaqan Qarabalauly mal sharýashylyǵymen qatar ańshylyqty da kásip etken, elge syıly aqsaqal bolǵan. Al, anasy Qaırol Zıqanqyzy - 3 qyz, 5 ul tárbıelep ósirgen ardaqty ana. Іrgesinen júırigi, jelisinen qulyny kisinegen, mal men basy qatar ósip, qut qonyp, qydyr daryǵan Soltaqan áýletiniń qara shańyraǵynda qazir kenje uly Ómirbek ata kásipti jalǵastyryp júr. Malshynyń jubaıy tórt balanyń anasy Kaýsar Kamessııaqyzy atalmysh baqtyń kishi dárigeri bolyp qyzmet atqarady.
Atalǵan basylym «Memlekettik sańlaq malshy» atanǵan Ómirbek Soltaqanulynan suhbat alǵan. Onda úzdik baqtashy osynshama kóp maldy baǵýdyń qıyndyqtary men qyzyqty tustaryn aıtyp bergen. Ol sondaı-aq tilshige tabıǵaty qatal óńirde mal baǵýdyń qyr-syrymen bólisken.
Aıta keteıik, ata jolyn qýyp, mal sharýashylyǵymen aınalysqan Ómirbek ótken jyly 100-ge tarta jylqy, 200 sıyr, 400 qoı, 1 000-nan astam eshkisin sanatqan.
Malshy áńgime barysynda jylyna 80-90 sıyry tóldep otyratynyn aıtty.
Qazaqstan Katardyń ınvestıtsııa salýyn qoldaıdy - «Parstoday»
Qazaqstan Prezıdenti Qasym-Jomart Toqaev Katarmen ınvestıtsııa salýdy qoldaý jáne yntalandyrý týraly kelisimge qol qoıdy.
Bul týraly osy aptada Irannyń «Parstoday» aqparat agenttigi habarlaıdy.
Atalǵan aqparat agenttiginiń habarlaýynsha, kelisimniń maqsaty ınvestıtsııalyq jobalardy oryndaýǵa qolaıly jaǵdaı jasaý arqyly taraptar arasynda ekonomıkalyq yntymaqtastyqty arttyrý bolyp otyr.
Bul kelisim ekonomıkalyq Yntymaqtastyq jáne damý uıymynyń standarttary, BUU-nyń saýda jáne damý konferentsııasynyń prıntsıpteri jáne Dúnıejúzilik banktiń usynystaryna sáıkes daıyndaldy. Munymen qosa, kelisimniń belgili bir sheńberi bar. Onda eki eldiń terrıtorııasynda ınvestıtsııalyq jobalardy oryndaý kezinde ınvestorlardyń quqyqtaryn halyqaralyq deńgeıde kepildendirý qarastyrylǵan.
Ǵaryshkerlerdiń jerge oralýy keıinge qaldyryldy - TRT
Ǵaryshkerlerdiń jerge oralýy aýa raıynyń qolaısyzdyǵyna baılanysty keıinge qaldyryldy, dep habarlady Túrkııa Radıo Televızııa portaly.
Atalǵan BAQ-tyń dereginshe, quramynda Túrkııanyń tuńǵysh ǵaryshkeri Alper Gezeravjy bar «Axiom-3» komandasynyń Jerge oralýy qaıtadan keshikti. Ǵaryshkerlerdiń Jerge oralýynyń keshigýine aýa raıynyń qolaısyzdyǵy sebep bolǵan.
Bul týraly «SpaceX» kompanııasy Halyqaralyq ǵarysh stansasynan habarlaǵan.
«Habarlamada «Amerıka Qurama Shtattarynyń Florıda shtatynda aýa raıynyń qolaısyzdyǵyna baılanysty ǵaryshkerler Halyqaralyq ǵarysh stansasynan shyǵýyn keshiktirdi. Aýa raıyn baqylaýdy jalǵastyramyz» dep jazady «TRT».
