Chempıon bolýdy arman emes, maqsat dep qabyldaý kerek – Almat Kebispaev
ASTANA. KAZINFORM — Grek-rım kúresinen bes dúrkin álem chempıonatynyń júldegeri, eki dúrkin Azııa chempıony, Azııa oıyndarynyń júldegeri Almat Kebispaev jas balýandarǵa jetistikke jetý úshin ózine senip, júıeli daıyndalý mańyzdy ekenin aıtty. Sondaı-aq ol ulttyq quramadaǵy irikteý júıesi, jas sportshylarǵa múmkindik berý, sheteldegi oqý-jattyǵý jıyndary jáne eldegi sport ınfraqurylymyn damytý máselelerine toqtaldy.
Almat Kebispaev bul týraly elordada sport aptalyǵy aıasynda Botanıkalyq baqta ótken «10 000 qadam» aktsııasy barysynda Kazinform tilshisine bergen suhbatynda aıtty.
Onyń pikirinshe, mundaı sharalar halyqty sportqa tartýmen qatar, jastarǵa jańa maqsat qoıýǵa múmkindik beredi.
— Osyndaı sharalar, eń birinshiden, mereke ǵoı. Barlyǵymyz bas qosyp, sport arqyly birigip, qazir qadam jasap jatyrmyz. Kúndelikti bir aınalymda júre bergennen góri, osyndaı sharalar uıymdastyrylsa, adamdy shabyttandyrady, jańa belesterge qadam basýǵa jeteleıdi, — dedi Almat Kebispaev.
Qazir basshylyq qyzmet atqaryp júrgen balýan kúresten alystamaǵanyn aıtty. Ol ýaqyt taýyp sportshylardyń daıyndyǵyn baqylap, zaldaǵy jumysty da jalǵastyryp júrgenin jetkizdi.
— Biz kúresten qatty alystap ketken joqpyz, arasynda ózimiz de jattyǵamyz. Ýaqyt taýyp sportshylardyń daıyndyǵyna qarap qoıamyz. Negizgi jumysymyz qyzmet. Biraq tańerteńnen keshke deıin kabınette otyra bergennen jumys kóp bitpeıdi. Zaldy aralap, barlyǵyn úılestirýge tyrysamyz. Kúrespen ómirimiz tikeleı baılanysyp ketti. Qaıda júrsek te, qaı elge nemese qaı salaǵa barsaq ta, kúres jadymyzda. Túbinde bapkerlikke qaıta kelsek te tań qalmańyzdar, — dedi ol.
Bes dúrkin álem chempıonatynyń júldegeri jas balýandar arasynda ulttyq quramaǵa enip, iri halyqaralyq jarystarǵa qatysýǵa múmkindik alyp jatqan sportshylar bar ekenin aıtty. Onyń aıtýynsha, ózi bapkerlik qyzmet atqarǵan kezeńde 2005-2008 jyldary týǵan balýandarmen jumys istegen.
— 2005-2008 jylǵy balalardy jattyqtyrdyq. Qazir sol alǵashqy jylǵylardyń, mysaly, 2005 jyly týǵan balýandardyń ulttyq quramaǵa enip, álem chempıonatyna barýǵa múmkindigi bolyp jatyr. Ázirge naqty kim baratyny belgisiz. Alda Germanııada ótetin týrnırler bar. Sol jarystardaǵy nátıjelerge qarap, ózin jaqsy kórsetken balýandardy aparady dep oılaımyn, — dedi ol.
Sportshynyń pikirinshe, ulttyq quramaǵa irikteý kezinde ashyqtyqqa basymdyq bergen jón. Ol sportshyny jarysqa az ýaqyt qalǵanda anyqtaýdyń ornyna, aldyn ala iriktep, uzaq merzimdi jospar boıynsha daıyndaý qajet ekenin aıtty.
— Aldyn ala irikteý jasalyp, sol balalarmen tyńǵylyqty daıyndalǵan durys. Jaqyn arada daıyndyq jasaý qıyn. Jospar boıynsha kem degende alty aı jumys isteý kerek. Biraq bul jerde bir balamen ǵana júrmeıdi. Bas bapkerlerdiń óz kózqarasy bar, bir salmaqta eki-úsh balany qarastyrýy múmkin. Solardyń arasynan kim baratyny sheshiledi, — dedi sportshy.
Almat Kebispaev bir ǵana jarystyń nátıjesine qarap balýanǵa baǵa berý durys emes dep sanaıdy. Onyń aıtýynsha, maýsym boıy turaqty túrde synalyp, birneshe jarysta ózin kórsetken sportshyǵa basymdyq bergen tıimdi.
— Bir jarysty kezdeısoq jeńip alýy múmkin nemese mańyzdy jarysta jaraqat alyp qalýy múmkin. Sondyqtan búkil maýsym boıy ózin kórsetken balýandy baǵalaý kerek. Arnaıy turaqty birneshe jarys uıymdastyryp, sol jerde ózin kórsetken sportshylardy irikteýge bolady. Biraq elimizde mundaı bekitilgen jarystar az bolǵandyqtan, bas bapkerler halyqaralyq týrnırler arqyly iriktep júr, — dedi ol.
Sonymen qatar Almat Kebispaev qazirgi sporttaǵy basty talaptardyń biri jattyǵý protsesin ǵylymı jáne medıtsınalyq turǵyda baqylaý ekenin atap ótti. Onyń aıtýynsha, sportshynyń jasy men fızıkalyq jaǵdaıyna qaraı júkteme kólemi ózgerip, jattyǵý protsesi jarys kúntizbesine sáıkes kezeń-kezeńimen josparlanýy kerek. Bul rette sportshynyń qalpyna kelýine jetkilikti ýaqyt bólinip, júkteme naqty kórsetkishterge súıenip rettelýi tıis.
— Ár jas kezeńinde daıyndyq barysynda ózgeris bolýy múmkin. Qalpyna kelý, júktemeni kóterý múmkindigi munyń bári medıtsınalyq turǵyda baqylaýmen jasalýy kerek. Prımıtıvti túrde jattyǵa berýge bolmaıdy. Biz keıde óz sezimimizge qarap jattyǵamyz. Olaı bolmaýy kerek. Tsıfr bárin kórsetedi. Sondyqtan tsıfrǵa qaraý kerek. Bul ǵylymı tásil. Jarysqa qansha aı, qansha kún qalǵanyn esepteý kerek. Qaı kezde maksımaldy júkteme alý qajet ekenin bilý mańyzdy. Erte bastap qoısań, jaraqatqa ákelýi múmkin. Tym kesh bastasań, qalpyna kelýge ýaqyt bolmaıdy. Munyń bárin esepteý kerek. Medıtsına degen tek vıtamın emes. Medıtsına — osynyń barlyǵy, ıaǵnı ǵylym, — dedi Almat Kebispaev.
Suhbat barysynda ol qazirgi býynǵa qajetti jaǵdaıdyń kópshiligi jasalǵanyn atap ótti. Sondyqtan balýannyń nátıjesine tek syrtqy jaǵdaı emes, onyń ózine degen jaýapkershiligi de áser etedi.
— Ár zamannyń óziniń jaqsy jáne kemshilik tustary bar. Sondyqtan óz zamanymdy jamandaýǵa bolmaıdy. Ol kezderi de aıtarlyqtaı jetistikke jettik. Qazir barlyǵy bar, tek syltaý aıtpaı jumys jasaý kerek. Ne izdeseń, sony kóresiń. Múmkindik izdeseń, múmkindik tabasyń. Al syltaý izdeseń, qansha jerden jaǵdaı jasasa da qanaǵattanbaısyń, — dedi ol.
Ol jas balýandarǵa óz múmkindigine kúmán keltirmeýge keńes berdi. Sportshynyń sózinshe, álem nemese Olımpıada chempıony bolý qol jetpeıtin arman retinde emes, naqty maqsat retinde qabyldanýy kerek.
— Eshqashan kúmándanbaý kerek. Senim bolýy tıis. Álem chempıony nemese Olımpıada chempıony bolýdy arman sııaqty emes, shynaıy maqsat retinde qaraý kerek. Óıtkeni barlyǵynyń qolynan keledi. Biz keıde jetistikti múmkin emes nárse sııaqty qabyldaımyz. Biraq halyqaralyq jarystarda Olımpıada, álem chempıonattarynda jeńgen balýandardy bizdiń sportshylar jeńip júr. Tek ózine shamadan tys júk artyp qoıýǵa bolmaıdy. Jeńil qaraý kerek. Naqty jospar qoıyp, tyńǵylyqty daıyndalý kerek. Babyń kelip tursa, 20 jasta da, 30 jasta da, tipti shamań jetip, babynda bolsań, 40 jasta da úlken jetistikke jetýge bolady, — dedi sportshy.
Balýan 77 keli salmaqtaǵy básekelestikke de toqtaldy. Onyń aıtýynsha, Demeý Jadyraev Qazaqstan kýbogynda óziniń myqtylyǵyn taǵy bir márte dáleldegenimen, Olımpıadaǵa deıin ishki básekelestik saqtalýy kerek.
— Qazir sońǵy Qazaqstan kýbogynda Demeý óz myqtylyǵyn dáleldedi. Oǵan eshkimniń talasy joq. Biraq Olımpıadaǵa deıin áli ýaqyt bar. Sondyqtan bosaýǵa bolmaıdy. Kerisinshe, sońyna deıin básekelestikti jalǵastyrý kerek. Demeý sol básekelestiktiń arqasynda chempıon bolýyna da sebepshi bolady. Demeý barmaǵan jaǵdaıda da basqa balalar daıyn turýy kerek. Bir balaǵa ǵana qarap jospar qurýǵa bolmaıdy. Árqashan rezervte daıyn sportshylar bolýy qajet, — dedi balýan.
Almat Kebispaev kúresti damytý jumystary óńirlerde de jalǵasyp jatqanyn atap ótti. Onyń pikirinshe, sporttyq ınfraqurylymnyń qoljetimdi bolýy balalardy sportqa tartýǵa múmkindik beredi. Buqaralyq sport pen kásibı sporttyń ózara tyǵyz baılanysty ekenin atap ótti.
— Buqaralyq sporttan kásibı sportshy shyǵady. Óıtkeni chempıondar kópshiliktiń arasynan shyǵady. Sondyqtan salaýatty ult, salaýatty qoǵam qalyptastyrsaq, halyq arasynan myqty sportshylarymyz ben chempıondarymyz da shyǵa beredi, — dep túıindedi Almat Kebispaev.
Eske sala keteıik, Almat Kebispaev nege jas balýandarǵa jol bermeı júrgenin jazǵanbyz.
Kilemge qaıta oralǵan Almat Kebispaev spartakıada chempıony atanǵan edi.
