Chempıondyqqa úmitti «Astana» Shymkentte jeńildi
ASTANA. QazAqparat - Qazaqstan Premer-lıgasynyń 31-týryndaǵy ortalyq kezdesýde «Astanany» qabyldaǵan «Ordabasy» 2:1 esebimen jeńiske jetti, dep habarlaıdy «QazAqparat» HAA.
Eýropa lıgasynyń mańyzdy matchy aldynan ekinshi qurammen alańǵa shyqqan elordalyqtar Shymkentte taban tiresken qarsylyqqa kezikti. Óz jankúıerleriniń kóz aldynda abyroıly oıyn kórsetýge tyrysqan jergilikti ujym alǵashqy taımda-aq jeńis úshin alańǵa shyqqanyn dáleldep, 35-mınýtta esep ashty, gol avtory - Erkebulan Tuńǵyshbaev.
Alaıda, «Astana» sapyna qosalqy quramnan qosylǵan Jorje Despotovıch alań ıeleriniń qorǵanys shebindegi óreskel qatelikti utymdy paıdalanyp, 60-mınýtta esepti teńestirdi. Al araǵa nebári úsh mınýt salyp, shymkenttikter taǵy da alǵa shyqty, bul joly aıyp alańyndaǵy qarbalasta sátti pozıtsııa ıelene bilgen Abdýllaı Dıakate tepken dop qaqpa toryn týlatty.
Osylaısha, el chempıondyǵy úshin kúres qyza tústi. Basqa básekelesterinen áli de bolsa bir oıyn kem ótkizgen «Astana» 25 qazanda 24-týrdyń qalyp qoıǵan matchynda «Oqjetpesti», al maýsymnyń sońǵy kezdesýinde, 5 qarashada «Aqjaıyqty» qabyldaıdy. Osy eki matchtyń aralyǵynda, ıaǵnı 28 qazan kúni 32-týr aıasynda bıylǵy maýsymnyń eń ymyrasyz oıyny bolaıyn dep tur: elordalyq ujymnan 1 upaı artta kele jatqan almatylyq «Qaırat» Astanaǵa keledi. Jankúıerlerdiń pikirinshe, osy oıynda chempıon taǵdyry sheshilýi tıis.
Jalpy, 31-týrdan soń 30 oıyn ótkizgen «Astana» 73 upaımen birinshi bolyp tur, al 72 upaımen «Qaırat» ekinshi, 55 upaı jınaǵan «Ordabasy» úshinshi orynǵa turaqtady.
