Chempıondar túni IBA: boksshylar salmaq ólshep, kóz arbasty
Búgin, ıaǵnı 15 jeltoqsan kúni elorda tórinde alǵash ret bokstan «Chempıondar túni IBA» - «Astana Arlans» týrnırine qatysatyn boksshylar tarazyǵa túsip, kóz arbasý rásimin ótkizdi, dep habarlaıdy Kazinform.
QR Boks federatsııasynyń baspasóz qyzmetiniń habarlaýynsha, salmaq ólsheý rásimi Astanadaǵy eń sáýletti ǵımarattardyń biri - «Han-Shatyr» saýda jáne oıyn-saýyq ortalyǵynda ótti. 16 sportshy salmaq ólshedi.
Aıta keteıik, boks keshinde otandyq bylǵary qolǵap sheberleriniń qatysýymen 8 qyzyqty jekpe-jek uıymdastyrylady. Ár aıqas 6 raýndtan turady.
Keshtiń basty jekpe-jeginde - 71 keli salmaqta Rıo Olımpıadasynyń chempıony, 2013 jylǵy álem chempıony Danııar Eleýsinov (11-0, KO 6) Ońtústik Afrıka Respýblıkasynyń ókili Djabýlanı Makhensemen (14-2, KO 7) judyryqtasady. Eleýsinov buǵan deıin 2015 jyly sharshy alańǵa shyqqan edi. Al Makhense alǵash ret syrt elde aıqasady.
Keshtiń basty jekpe-jegi:
71 keli
Danııar Eleýsinov (70,8 keli) - Djabýlanı Makhense (70,7 keli)
80 keli
Bekzat Nurdaýletov (79,9 keli) - Nıkıta Zon (79,9 keli)
67 keli
Dýlat Bekbaýov (66,4 keli) - Harıton Agrba (66,5 keli)
80 keli
Erasyl Jaqpekov (79,45 keli) - Gradýsom Klaýs (79,45 keli)
71 keli
Aslanbek Shymbergenov (70,7 keli) - Hose Mıgel Borrego (69,25 keli)
63,5 keli
Serik Temirjanov (62,4 keli) - Pavl Fedorov (63,5 keli)
57 keli
Mahmud Sabyrhan (57 keli) - Osvaldo Dıas (56,9 keli)
51 keli
Sanjar Táshkenbaı (50,6 keli) - Nodırjon Mırzaahmedov
Elimizde boks keshin erteń 19:00-de - Qazsport, al Reseıde — «Match TV» kanaldary tikeleı efırde kórsetedi.
