Chempıondar shańyraǵynda bolashaq chempıon dúnıege keldi!
ASTANA. 22 tamyz. QazAqparat - Búgin Qazaq memlekettik qyzdar pedagogıkalyq ýnıversıtetiniń ujymy óz stýdenti, Olımpıada chempıony Maııa Manezany perzenthanadan shyǵaryp aldy.
Bul týraly «Qyzdar ýnvıersıteti» medıa ortalyǵyǵynyń baspasóz baıanynda habarlanǵan.
Maııa Maneza qajyrly eńbeginiń arqasynda 2009 jáne 2010 jyldary 63 keli salmaq dárejesinde álem chempıony atandy. Sonymen qatar, ol 2010 jyly Azııa oıyndaryn utqan sportshy. 2011 jyly Parıjde ótken saıysta kúmis júldeni qanjyǵasyna baılasa, 2012 jyly London olımpıadasynda altynnan alqa taǵynyp, elimizdiń mártebesin álem aldynda asqaqtatty.
Maııa Maneza - baqytty ana! Ol dúıim jurtqa óziniń myqtylyǵyn tanytqan, kúrese bilgen, darynyn dáleldegen sportshy. Mine, sol baqyty eki eselenip, Qyzdar ýnıversıteti úkilep uzatqan Maııa Maneza úlken baqytqa da qol jetkizdi. 20 tamyz kúni chempıondar shańyraǵynda bolashaq chempıon dúnıe esigin ashty. Uldy bolyp jatqan baqytty áke Vıacheslav Ershov ta: «Ulymyzǵa Arsenıı atty esim berdik. Arsen, Arsenıı uqsas. Musylmandyqqa da, provoslavqa da jaqyn atty tańdadyq. Biz baqyttymyz», - dep kózi nurǵa, kóńili shattyqqa tola kelgen qonaqtarǵa aǵynan jaryldy.
Qyzdar ýnıversıteti qazaqy salt-dástúrmen «Qyz Jibek» klýbynan uzatylǵan Maııaǵa artynan ergen sińlilerine úlgi bolarlyqtaı shańyraqtyń uıytqysyna aınalady degen senim bildiredi. Maııa Maneza - Qyzdar ýnıversıtetiniń maqtanyshy ǵana emes, Qazaqstan sportynyń bolashaǵy. Arsenıı batyrdy dúnıege ákelgen jas ana, aıaq-qolyn baýyryna alyp, qalpyna kelip, Rıo-de-Janeıroda ótetin olımpıadadan altynnan alqa taǵynyp Qazaqstan halqynyń qýanysh eseleı túsedi degen senimdemiz.
Qazaqstan sportynda qýanysh azaımasyn! Kók týdy jelbiretken sportshylar baıraqty túsirmeıtin ul-qyzdardy ósire bersin!
