Chempıondar lıgasynyń toptyq kezeńi aıaqtaldy
NUR-SULTAN. QazAqparat - Búgin fýtboldan UEFA Chempıondar lıgasy toptyq kezeńindegi sońǵy týrynyń oıyndary ótti, dep habarlaıdy QazAqparat tilshisi.
Belgııada «Brıýgge» komandasy ıspanııalyq «Real Madrıd» ujymyn qabyldady. Oıynnyń birinshi bóligi qonaqtardyń basymdyǵymen ótti. Lýka Iovıch, Isko syndy fýtbolshylar esep ashatyn sátterdi múlt jiberdi. Bas tóreshi birneshe ret tártip buzǵan 4 aıaq-dop sheberine eskertý qaǵazyn kórsetti.
Ekinshi taımda «Realdyń» jas shabýylshysy Rodrıgo tablodaǵy esepti ózgertti. Esep 0-1! Al 54-mınýtta Vanaken tarazy basyn teńestirdi. Alaıda brazılııalyq Vınısıýs madrıdtik klýbty alǵa shyǵardy. Oıyn sońyna taman Lýka Modrıch komandasynyń úshinshi golyn soqty. Qorytyndy nátıje —1:3.
Búgingi túnniń basty jańalyǵy — Italııa ókili «Atalanta» komandasynyń óz tarıhynda birinshi ret Chempıondar lıgasynyń pleı-off kezeńine shyǵýy.Olar Ýkraına chempıony «Shahterdi» 0:3 esebimen utty. Nátıjesinde ýkraınalyqtar Eýropa Lıgasyna túsip qaldy.
Aıta keteıik, buǵan deıin S tobynda synǵa túsip jatqan Anglııanyń «Manchester Sıtı» komandasy syrt alańda Horvatııanyń «Dınamo» (Zagreb) klýbymen sheberlik baıqasty.
Osylaısha, búgin fýtboldan UEFA Chempıondar lıgasy toptyq kezeńi aıaqtaldy. Fınaldyq kezeń kelesi jyly ótedi.
