Chempıondar lıgasynyń fınaldyq matchy Sankt-Peterbýrgte emes, Parıjde ótetin boldy
NUR-SULTAN. QazAqparat – Eýropa fýtbol qaýymdastyǵy odaǵy (ÝEFA) 2021-2022 jylǵy maýsymdaǵy Chempıondar lıgasynyń fınaldyq matchyn Sankt-Peterbýrgten Parıjge aýystyrý jóninde sheshim qabyldady, dep habarlaıdy QazAqparat tilshisi.
ÝEFA málim etkendeı, bas eýrokýboktyń sheshýshi oıyny 28 mamyr, senbi kúni «Stad de Frans» stadıonynda ótedi.
ÝEFA-nyń atqarýshy komıteti kezekten tys otyrysynda Eýropadaǵy jaǵdaıdyń kúrdelenýine baılanysty osyndaı sheshimge kelgen.
Fýtbol qaýymdastyǵy túsinistik pen qoldaý tanytqany úshin Frantsııa prezıdenti Emmanýel Makronǵa alǵysyn bildirdi.
Sonymen qatar ÝEFA aıasynda Reseı men Ýkraına aýmaǵynda ótýi tıis barlyq klýbtar men quramalardyń oıyndary beıtarap alańǵa aýystyrylatyn bolady.
Eske sala keteıik, budan buryn Chempıondar lıgasynda «Manchester ıÝnaıtedtiń» alǵashqy kezdesýinde teń túskenin jazǵan bolatynbyz.
