Chempıondar lıgasynda qazaqstandyq bapker kútpegen nátıje kórsetti
ASTANA. QazAqparat - Qazaqstandyq bapker Vladımır Chebýrın jáne lıtvalyq «Sýdýva» komandasy kıprlik APOEL-ge qarsy shyǵyp, basym tústi, dep habarlaıdy «SPORTINFORM» SAA.
Birinshi matchta qazaqstandyq bapkerdiń komandasy eki dop soǵyp, jeńis tuǵyryna kóterilgen. Al komandalardyń qarsy kezdesýinde APOEL Lıtva komandasynyń qaqpasyna bir ǵana gol saldy. Bul nátıjeni tańǵalarlyq dep ataýǵa bolady, sebebi Chempıondar lıgasynyń irikteý kezeńinde kıprlik komandaǵa molyraq senim artylǵan.
Aıta ketý kerek, «Sýdývanyń» quramynda Qazaqstan chempıonatymen jaqyn tanys eki fýtbolshy oınaıdy. Lıtva klýbynyń orta alaǵynda «Qaırattyń» eks-havbegi Herson Asevado men «Shahter» klýbynyń burynǵy fýtbolshysy Mıhret Topchagın oınaıdy.
Týrnırdiń kelesi kezeńinde «Sýdýva» komandasy alańǵa serbtik «Tsrvena Zvezdamen» shyǵady. Qarsylas komanda buǵan deıin latvııalyq «Spartaktan» basym túsip, jeńimpaz atanǵan edi.
