Chempıondar lıgasy: Jartylaı fınalǵa shyqqan alǵashqy komanda anyqtaldy
NUR-SULTAN. QazAqparat - Búgin UEFA Chempıondar lıgasynyń shırek fınaly bastaldy, dep habarlaıdy QazAqparat tilshisi.
Esterińizge sala ketelik, Chempıondar lıgasynyń qalǵan bóligi Portýgalııa astanasy - Lıssabon qalasynda ótedi. Ol segizdik fınaly formatynda bolady. Oıyndar - 12-23 tamyz aralyǵynda.
Shırek fınal «Atalanta» (Italııa) jáne «Parı Sen-Jermen» (Frantsııa) komandalary arasyndaǵy kezdesýden bastaldy. Jankúıerler jeńiske frantsııalyq klýb jetedi degen joramal jasaǵan bolatyn. Dese de «Atalanta» ońaı shaǵylatyn jańǵaq emes ekenin ańǵartty.
Alǵashqyda oıyn tizginin «Parı Sen-Jermen» ustaýǵa tyrysty. «Atalanta» qarymta shabýylǵa shyǵýǵa nazar aýdardy. Oıynnyń 26-mınýtynda olardyń qatarynan Mapıo Pashalıch gol soǵyp, óz komandasyn alǵa shyǵardy. Biraq bul esepti oıyn sońyna deıin ustap tura alǵan joq. Kezdesýdiń toqsan mınýt túgesiler tusynda «Parı Sen-Jermen» sapynan aldymen Markınos, odan keıin Erık Shýlo-Motıng gol soǵyp ketti. Qarsylasynan 2:1 esebimen basym túsken «Parı Sen-Jermen» jartylaı fınalǵa joldama aldy. Bul komanda endi 18 tamyzda «Leıptsıg» (Germanııa), «Atletıko Madrıd» (Ispanııa) jubynyń jeńimpazymen oınaıdy.
Endi 13-15 tamyzda shırek fınaldyń qalǵan oıyndary ótkiziledi. Aldymen 13 tamyzda «Leıptsıg» (Germanııa), «Atletıko Madrıd» (Ispanııa) komandalary kezdesedi, Al 14 tamyzda «Barselona» (Ispanııa) men «Bavarııa» (Germanııa), 15 tamyzda «Manchester Sıtı» (Anglııa) men «Lıon» (Frantsııa) komandalary sheberlik baıqasady.
Jartylaı fınal 18-19, fınal 23 tamyz kúnderi ótkiziledi.
