Chempıondar lıgasy. «Real» «Volfsbýrgtan» utylyp qaldy
ASTANA. QazAqparat - Fýtboldan Chempıondar lıgasynyń shırek fınalyndaǵy birinshi oıyndar aıaqtaldy. Nazarlaryńyzǵa kezdesýler nátıjesin usynamyz.
«PSJ» (Frantsııa) - «Manchester Sıtı» (Anglııa), 2:2.
Frantsııa ishki birinshiliginde chempıondyq ataqty erte jeńip alǵan parıjdik «PSJ» bar kúshin Chempıondar lıgasyna salatyny anyq. Aǵylshyndyq «Manchester Sıtıge» qarsy oıynda aıqyn favorıt sanalǵanmen, Loran Blan komandasy jeńiske jete almady.
Tóreshi ysqyryǵy shalynysymen Davıd Lýıs Serhıo Agýeroǵa qarsy oıyn erejesin buzyp, Chempıondar lıgasy tarıhyndaǵy eń jyldam sary qaǵazdy ıelendi. Qorǵaýshy kelesi oıynǵa qatyspaıdy.
14 mınýtta «Manchester Sıtı» qaqpasyna penaltı belgilendi. Tájirıbeli Zlatan Ibragımovıch Anglııa quramasynyń qaqpashysy Djo Harttan aılasyn asyra almady. Arada 10 mınýt ótkende shvetsııalyq shabýylshy ózindegi ekinshi tamasha múmkindikti múlt jiberdi.
Oıynda esepti birinshi bolyp qonaqtar ashty. Jaqynda ǵana jaraqatynan aıyǵyp kelgen Kevın de Brıýıne «Manchester Sıtıdi» alǵa shyǵardy.
Alaıda araǵa 3 mınýt sala Zlatan Ibragımovıch qorǵaýshy Fernandonyń óreskel qateliginen keıin tarazy basyn teńestirdi.
60 mınýtta «PSJ» komandasy oıynda alǵa shyqty. Buryshtamadan asyrylǵan dopty Edınson Kavanı qaqpaǵa týra baǵyttady. Djo Hart bul soqqyny qaıtarǵanmen, jaqyn mańdaǵy Adrıen Rabo dopty qaıta qaqpaǵa baǵyttap, esepte komandasyn alǵa shyǵardy. Araǵa 3 mınýt sala Zlatan kezekti ret shabýylda kózge túskenmen, onyń baspen baǵyttaǵan doby qaqpa baǵanynan keri serpildi.
Parıjdik klýb eseptegi basymdyǵyn oıyn sońyna deıin saqtap qala alǵan joq. 72 mınýtta Fernandıno tarazy basyn teńestirdi. Nátıjesinde aǵylshyndyq klýb syrt alańda soqqan goldarynyń basymdyǵyna ıe boldy.
Qos klýb arasyndaǵy qarymta oıyn 12 cáýir kúni Manchesterde ótedi.
«Volfsbýrg» (Germanııa) - «Real» (Ispanııa), 2:0.
Shırek fınalda eshkim kútpegen nátıje osy oıynda oryn aldy. Madrıdtik «Real» syrt alańda «Volfsbýrgqa» eki dop aıyrmasymen ese jiberdi.
Oıynda 2 mınýtta-aq gol soǵylǵan bolatyn. Alaıda qaptaldaǵy tóreshi Krıshtıaný Ronaldýdyń soqqan golyn esepke alǵan joq. 17 mınýtta Kazemıro óz aıyp alańynda Andre Shıýrrlege qarsy oıyn erejesin buzdy. Bas tóreshi oılanbastan «Real» qaqpasyna penaltı belgiledi. 11 metrlik aıyp soqqysyn Rıkardo Rodrıges sátti oryndap shyǵyp, komandasyn alǵa shyǵardy. 24 mınýtta Maksımılıan Arnold «koroldik klýb» qaqpasyna ekinshi goldy toǵytty.
Birinshi taımda Karım Benzema jaraqat alyp, onyń ornyna Hese shyqty. «Real» oıynshylary dopty alyp, alǵa san ret umtylǵanmen nátıje shyǵara almady. Esesine nemis ujymynyń qarymta shabýyly Keılor Navas qaqpasyna aıtarlyqtaı qaýip tóndirip turdy.
69 mınýtta «Real» qorǵaýshysy Marselo Maksımılıan Arnoldqa qarsy qaqtyǵys jasap, ózi uıatqa qalǵan qylyq kórsetti.
Saýatty qorǵana bilgen «Volfsbýrg» jartylaı fınalǵa shyǵý múmkindikterin joǵarylatty. Qarymta oıyn 12 sáýir kúni Madrıdtegi «Santıago Bernabeý» stadıonynda ótedi.
Aıta keteıik, keshe ótken oıyndarda «Barselona» madrıdtik «Atletıkony», «Bavarııa» lıssabondyq «Benfıkany» utqan bolatyn, dep jazady massaget.kz.
