Chempıondar lıgasy: «Real» óz alańynda jeńilip qaldy
NUR-SULTAN. QazAqparat - Búgin UEFA Chempıondar lıgasy 1/8 fınaldyq kezeńiniń alǵashqy oıyndary aıaqtaldy, dep habarlaıdy QazAqparat tilshisi.
Ispanııanyń «Realy» óz alańynda Anglııanyń «Manchester Sıtı» klýbyn qabyldady. Eki ujym da jeńiske jetý jolynda tynbaı ter tókti. Birinshi kezeń olardyń alma-kezek shabýylymen órbidi. Dese de bir-biriniń qaqpasynan sańylaý taba alǵan joq. «Sıtı» shabýylshysy Gabı Jezýs qaqpashymen betpe-bet shyqqan. Alaıda onyń soqqysyn qaqpashy qaıtardy. Birinshi taımda qonaqtardyń qorǵaýshysy Aımerık Lıaport jaraqat alyp, alańnan ketti.
Ekinshi taım «Manchester Sıtıdiń» basymdyǵymen ótti. 59-mınýtta qarymta shabýyl kezinde «Real» esep ashqan. Qorǵaýshylardy aldap ótken Vınısıýs Jýnıor áriptesi Iskoǵa pas berdi. Sońǵysy qatelesken joq. Esep – 1:0! Qarymta shabýyldardyń birinde aǵylshyndyq klýbtyń oıynshysy Gabı Jezýs tarazy basyn teńestirip ketti. Ol aıyp alańyna asyrylǵan dopty qaqpaǵa baspen kirgizdi. Munan soń Kevın de Brıýıne penaltıden kózge túsip, esepti 1:2 qyldy. Oıyn sońyna taman bas tóreshi «Real» kapıtany Serhıo Ramosty tártip buzǵany úshin alańnan qýdy.
Qatar ótken «Lıon»-«ıÝventýs» matchynda frantsýzdar basym boldy. Kezdesýdegi jalǵyz goldy Týzar soqty.
Osylaısha, Chempıondar lıgasy 1/8 fınaldyq kezeńiniń alǵashqy oıyndary aıaqtaldy.
