Chempıondar lıgasy: «Real Madrıd» «Galatasaraıǵa» 6 gol soqty
NUR-SULTAN. QazAqparat – Búgin ÝEFA Chempıondar lıgasy toptyq kezeńiniń 4-týr oıyndary aıaqtaldy, dep habarlaıdy QazAqparat tilshisi.
Kóptiń nazaryn aýdarǵan oıyndardyń biri Ispanııa astanasynda «Madrıd» jáne Ystanbuldyń «Galatasaraı» komandalary arasynda boldy. Óıtkeni, sońǵy kezderi turaqsyz oınap júrgen Koroldik ujym búgin jeńilse, toptan shyǵý máselesi tym qıyndaı túseri anyq edi. Sondyqtan Zınedın Zıdan shákirtteri alǵashqy mınýttardan-aq shabýylǵa lap qoıdy. Bul óz jemisin berdi de. 4-mınýtta madrıdtikterdiń brazılııalyq shabýylshysy Rodrıgo Goes esep ashty. Taǵy úsh mınýttan soń 18 jastaǵy oıynshy esepti eseleı tústi. 14-mınýtta penaltıden kapıtan Serhıo Ramos komandasynyń úshinshi golyn soqty. 1-taım aıaqtalarda Rodrıgo Kárim Benzemaǵa tamasha pas berip, qaqpashymen jalǵyz qaldyrdy. Óz kezeginde frantsýz fýtbolshysy múlt ketken joq: 4-0.
Oıyn taǵdyryn erte sheship qoıǵan madrıdtikter ekinshi taımdy jaıbaraqat ótkizdi. Kárim Benzema Danı Karvahaldyń pasynan keıin esepti 5:0-ge jetkizdi. Al negizgi ýaqytqa qosylǵan qos mınýttyń sońǵy sekýndtarynda Benzemanyń pasynan keıin Rodrıgo het-trık ıesi atandy. 6-0 esebinde jeńiske jetken «Madrıd» tórt oıynda 7 upaı jınap, A tobynda 2-orynǵa berik ornalasty. Al 1-orynda upaıy túgel PSJ tur. Parıjdik ujym «Brıýggeni» óz alańynda jeńip, 12 upaımen pleı-ofqa joldama aldy.
Búgin ótken qalǵan oıyndarda mynadaı esepter tirkeldi:
«Bavarııa» - «Olımpıakos» 2:0
«Lokomotıv» - «ıÝventýs» 1:2
«Tsrvena Zvezda» - «Tottenhem» 0:4
«Baıer Leverkýzen» - «Atletıko Madrıd» 2:1
«Atalanta» - «Manchester Sıtı» 1:1
«Dınamo Zagreb» - «Shahter Donetsk» 3:3
