Chempıondar lıgasy: «Nemis mashınasy» «Arsenaldy» taptap ketti
ASTANA. QazAqparat - Nemistiń «Bavarııasy» aǵylshynnyń «Arsenalyn» Chempıondar lıgasy 1/8 fınalynyń alǵashqy kezdesýinde tas-talqan etti, dep habarlaıdy QazAqparat.
Kezdesý aqpannyń 15-inen 16-syna qaraǵan túni Mıýnhendegi "Alıants Arena" stadıonynda ótti. Oıyn 5:1 esebimen aıaqtaldy.
Birinshi taım 1:1 esebimen aıaqtalǵan. 11 mınýtta «Bavarııa» oıynshysy Aren Robben salǵan bir dopqa aǵylshyndar alǵashqy taımnyń aıaǵyna qaraı jaýap qaıtaryp úlgergen.
Alaıda 2 taımda eshkim kútpegen oqıǵa boldy. 53 mınýtta Robert Levandovskı esepti eseledi. Araǵa 3 mınýt salyp (56 mınýtta) Tıago Alkantara ekinshi jaýapsyz goldy qaqpaǵa týlatqan edi. Dál osy oıynshy qarsylastyń esin jyıdyrmastan 63 mınýtta dýbl avtory atandy. Oǵan qosa onyń 88 mınýtta Tomas Mıýllerge bergen pasy da golǵa aınalyp, oıyn taǵdyryna túbegeıli núkte qoıyldy. Esep 5:1.
Sondaı-aq, ChL-dyń 1/8 fınaly aıasynda ıspandyq «Real Madrıd» ıtalııalyq «Napolıdi» 3:1 esebimen jeńdi.
«Bavarııa» - «Arsenal» jáne «Real Madrıd» - «Napolı» komandalarynyń qarymta kezdesýleri Qazaqstan ýaqyty boıynsha naýryzdyń 7-inen 8-ine qaraǵan túni ótedi.
