Chempıondar lıgasy: «Manchester Sıtı» shabýylshysy Erlıng Holand bir oıynda bes gol soqty

ASTANA. QazAqparat - UEFA Chempıondar lıgasy shırek fınalyna joldama alǵan taǵy eki komanda belgili boldy, dep habarlaıdy QazAqparat tilshisi.

14 naýryzdan 15-ne qaraǵan túni Portýgalııanyń «Portý» komandasy óz alańynda Italııanyń «Interin» qabyldaǵan edi. Oıyn barysynda komandalar shabýylǵa kóshti. Degenmen qaqpa qulpy ashylmaı, 0:0 esebi tirkeldi. Alǵashqy kezdesýde 1:0 esebimen jeńiske jetken «Inter» jarysty jalǵastyratyn boldy.

Ekinshi kezdesýde Anglııanyń «Manchester Sıtı» jáne Germanııanyń «RB Leıptsıg» qaqpasyna jaýapsyz jeti dop soqty. Osy kezdesýde aǵylshyn klýbynyń norvegııalyq shabýylshysy Erlıng Holand 22, 24, 45, 53, 57-mınýttarda bes gol soqty. Taǵy eki goldy Ilkaı Gıýndagan 49, Kevın de Breıne 90-mınýttarda óziniń enshisine jazdy.

Osylaısha qarsylasyn 7:0 esebimen tize búktirgen aǵylshyndyq klýb shırek fınalǵa joldama aldy. Alǵashqy oıynda 1:1 esebi tirkeldi.

Aıta ketsek, Chempıondar lıgasy tarıhynda bir oıynda bes gol soqqan jaǵdaı úshinshi márte tirkelip otyr. Buǵan deıin ıspanııalyq «Barselona» sapynda óner kórsetken argentınalyq shabýylshy Lıonel Messı Germanııanyń «Baıer» qaqpasyna, Ýkraınanyń «Shahter» klýbynyń brazılııalyq shabýylshysy Lýıs Adrıano Belarýstiń BATE qaqpasyn bes márte dál kózdegen edi.

Eske salsaq, budan buryn «Bavarııa» (Germanııa), «Mılan» (Italııa), «Benfıka» (Portýgalııa) men «Chelsı» (Anglııa) komandalary shırek fınalǵa joldama aldy.

Endi 15 naýryzdan 16-na qaraǵan túni «Napolı» (Italııa) men «Aıntraht» (Germanııa), «Real Madrıd» (Ispanııa) jáne «Lıverpýl» (Anglııa) oınaıdy.