Chempıondar lıgasy: «Manchester Sıtı» qarsylasyn oısyrata jeńdi
NUR-SULTAN. QazAqparat - Búgin fýtboldan UEFA Chempıondar lıgasy toptyq kezeńindegi sońǵy týry máresine jetti, dep habarlaıdy QazAqparat tilshisi.
Qazirge deıin búgingi kúngi eki kezdesý aıaqtaldy. S tobynda synǵa túsip jatqan Anglııanyń «Manchester Sıtı» komandasy syrt alańda Horvatııanyń «Dınamo» (Zagreb) klýbymen sheberlik baıqasty. Aǵylshyndyq klýbtyń osy jarystaǵy orny bir týr buryn-aq belgili bolǵan. Soǵan qaramastan olar sońǵy týrda da qarqyndy oıyn kórsetti. Alań ıeleri qaqpasyna 4 gol saldy. Bul goldardy aǵylshyndyq klýb sapynan Gabrıel Jezýs 34, 50, 54, Fılıp Foden 84-mınýttarda soqsa, oǵan horvat fýtbolshylary sapynan 10-mınýtta Danıel Olmo bir ǵana golmen jaýap qaıyrdy. Nátıjesinde «Manchester Sıtı» qarsylasyn 4:1 esebimen oısyrata jeńdi.
Atalmysh toptaǵy Ýkraınanyń «Shahteri» óz alańynda Italııanyń «Atalanta» komandasynan 0:3 esebimen jeńilip qaldy. Oıyn barysynda ıtalııalyq klýb sapynan 66-mınýtta Tımotı Kastan, 80-mınýtta Marıo Pashalıch, 94-mınýtta Robın Gozens mergendigimen kózge tústi. Búgin ýkraındyq klýb jeńiske jetken jaǵdaıda jarysty jalǵastyrýǵa múmkindik alar edi. Esesine syrt alańda úsh upaı oljalaǵan «Atalanta» óz tobynda ekinshi orynǵa kóterildi.
Bul toptan «Manchester Sıtı» men «Atalanta» jarystyń 1/8 fınalyna joldama aldy. Al úshinshi oryn alǵan «Shahter» endi Eýropa lıgasy 1/8 fınalynda synǵa túsedi.
Sondaı-aq, búgin A, V, D toptarynda da oıyndar ótkiziledi.
Qazirge deıin barlyǵy jarysty jalǵastyratyn 10 komanda belgili bolyp otyr.
