Chempıondar lıgasy: Kil myqty komandalar básekesi
NUR-CULTAN. QazAqparat – Búgin UEFA Chempıondar lıgasy 1/8 fınalynyń eki oıyny ótkiziledi, dep habarlaıdy QazAqparat tilshisi.
Alǵashqy oıyn «RB Leıptsıg» (Germanııa) jáne «Lıverpýl» (Anglııa) komandalary arasynda ótkiziledi.
Kezdesý elorda ýaqytymen 01.50-de bastalyp, Qazaqstan telearnasynan tikeleı efırde kórsetiledi.
Aıta keterligi, eki komanda buǵan deıin Chempıondar lıgasynda bir-birimen eshqashan kezdesip kórgen emes. Bul oıyn Majarstan astanasy - Býdapesht qalasyndaǵy «Pýshkash Arena» stadıonynda bolady.
Atalǵan komandalar namysyn qorǵaıtyn memleketter arasynda koronavırýs ınfektsııasyna baılanysty áýe qatynasy toqtatylǵan. Qazir Eýropanyń keıbir elderinde qaterli indetke baılanysty saqtyq sharalary kúsheıtildi.
Eki komanda quramynda da jaraqat alǵan oıynshylar bar. «RB Leıptsıg» klýbynan Konrad Laımer, Bendjamın Henrıhs, Fabrıs Hartman, Emıl Forsberg, Domınık Soboslaı syndy fýtbolshylarǵa bapkerler úmit arta almaıdy. «Lıverpýl» sapynan dál osyndaı jaǵdaıdy Djozef Gomes, Nabı Keıta, Fabıno, Vırdjıl van Deık, Joel Matıp, Dıogý Jota basynan keshirip otyr.
Kezdesýge slovenııalyq Slavko Vınchıch qazylyq etedi. Oǵan kómekshilik qyzmetti Tomaj Klanchnık pen Andraj Kovachıch atqarady.
Taǵy bir oıyn «Barselona» (Ispanııa) jáne «Parı Sen-Jermen» komandalary arasynda bolady. Oıyn elorda ýaqytymen 01.50-de bastalyp, «Qazsport» telearnasynan tikeleı efırde kórsetiledi. Eki komanda buǵan deıin 11 márte kezdesti. Onyń 5-ýi «Barselonanyń» basymdyǵymen aıaqtalsa, qalǵanynda qarsylasy jeńiske jetti.
Eki komanda jarystyń atalǵan satysynda 2017 jyly jolyqty. Frantsııa astanasy - Parıj qalasynda 14 aqpanda ótken oıynda «Parı Sen-Jermen» azýly qarsylasyn 4:0 esebimen tize búktirgen edi. Al 8 naýryzda óz alańynda «Barselona» olardy 6:1 esebimen tas-talqan etip jeńdi. Osylaısha ıspandyq fýtbolshylar jarystyń kelesi satysyna joldama aldy. Sodan beri eki klýbtyń joly eýrokýbokta túıisken joq.
Búgingi oıynǵa alǵan jaraqatyna baılanysty «Barselona» sapynan Ansý Fatı, Serhı Roberto, Martın Braıtvaıt, Jerar Pıke, Fılıppe Koýtıno qatysa almaıdy. Al frantsýz klýbynan dál osyndaı jaǵdaımen Kolın Dagba, Hýan Bernat, Neımar, Marko Verrattı, Anhel Dı Marııa, Rafınıa jasyl alańǵa shyǵýdan tys qaldy.
Oıynǵa nıderlandylyq Born Kýıpers qazylyq etedi. Al oǵan kómekshi qyzmetine sol elden kelgen Sander van Rýkel men Ervın Zeınstra bekitilgen.
Bul juptar boıynsha qarymta kezdesý 10 naýryzǵa belgilengen. Jeńimpaz jarystyń kelesi satysyna shyǵady.
Fınaldyq oıyn 29 mamyrda Túrkııanyń Ystanbul qalasyndaǵy «Atatürk Olympic Stadium» arneasynda bolady.
