Chempıondar lıgasy: «Inter» 13 jyldan keıin jartylaı fınalǵa shyqty
ASTANA. QazAqparat - Fýtboldan UEFA Chempıondar lıgasy shırek fınalyna shyqqan komandalar belgili boldy, dep habarlaıdy QazAqparat tilshisi.
Sáýirdiń 19-nan 20-na qaraǵan túni eki oıynnyń birinde «Bavarııa» (Germanııa) men «Manchester Sıtı» (Anglııa) komandalary kezdesti.
Alǵashqy oıynda anglııalyq klýb 3:0 esebimen basym túsken edi. Condyqtan jankúıerler «Bavarııadan» shabýyl kútken edi. Esesine olar 57-mınýtta «Manchester Sıtı» shabýylshysy Erlıng Holandtyń golyn jiberip aldy. Oıynnyń 83-mınýtynda Iozýa Kımmıh penaltıden gol soqqanymen bul germanııalyq klýbqa jarysty jalǵastyrýǵa jetkiliksiz boldy.
Osylaısha eki oıynnyń qorytyndysymen «Manchester Sıtı» jarysty jalǵastyrýǵa múmkindik aldy.
Taǵy bir kezdesýde Italııanyń «Inter» jáne Portýgalııanyń «Benfıka» klýbtary synǵa tústi. Birinshi kezdesý 2:0 esebimen ıtalııalyq klýbtyń basymdyǵymen aıaqtaldy.
Qarymta kezdesýde komandalar 3:3 esebine qanaǵat bildirdi.
Oıyn barysynda «Inter» sapynan Nıkolo Barella 14, Laýtaro Martınes 65, Hoakın Korrea 78, «Benfıkadan» Fredrık Eýrsnes 38, Antonıý Sılva 86, Petar Mýsa 95-mınýtta gol soqty.
Eki oıynnyń nátıjesimen ıtalııalyq klýb jarysty jalǵastyratyn boldy.
Aıta ketsek, «Inter» óz tarıhynda 13 jyldan keıin jartylaı fınalǵa shyqty.
Eske salsaq, budan buryn «Mılan» men «Real Madrıd» jartylaı fınalǵa shyqty.
Endi jartylaı fınalda 9 jáne 16 mamyr kúnderi «Mılan» men «Inter», «Real Madrıd» pen «Manchester Sıtı» kezdesedi.
