Chempıondar lıgasy: «Bavarııa» fınalda synǵa túsedi
NUR-SULTAN. QazAqparat - UEFA Chempıondar lıgasy 2020/2021 jylǵy kezeńiniń fınalynda qaı komandalardyń synǵa túsetini tolyqtaı anyqtaldy, dep habarlaıdy QazAqparat tilshisi.
Búgin Germanııanyń «Bavarııa» jáne Frantsııanyń «Lıon» komandalary kezdesti. Jankúıerler jeńiske nemis klýby jetedi degen boljam jasap qoıǵan edi.
Tájirıbeli ujymnyń qatarynda sanalatyn «Bavarııa» bul joly da syr bergen joq. Frantsýz fýtbolshylary alǵashqy mınýttarda basymdyǵyn baıqatty. Ýaqyt óte kele nemis komandasy tizgindi óz qolyna aldy.
«Bavarııa» sapynan jas shabýylshy Serj Gnabrı eńbekqorlyǵymen kózge tústi. Ol 18 jáne 33-mınýttarynda qos goldyń avtory atandy.
Ekinshi kezeńde oıyn alma-kezek shabýylymen órbidi. Dese de eki komanda tarapynan gol soǵatyn kóptegen múmkindikter bosqa ketti. Oıynnyń 88-mınýtynda «Bavarııa» shabýylshysy Robert Levandovskı kezdesýdiń núktesin qoıdy. Osylaısha «Bavarııa» qarsylasynan 3:0 esebimen basym tústi.
Budan buryn Frantsııanyń «Parı Sen-Jermen» komandasy Germanııanyń «Leıptsıg» klýbynan 3:0 esebimen basym tústi. Osylaısha frantsııalyq fýtbolshylar fınalǵa joldama aldy.
Aıta keter bolsaq, Chempıondar lıgasynyń shırek fınalynan bastap qalǵan bóligi Portýgalııa astanasy - Lıssabon qalasynda ótip jatyr. Ol segizdik fınaly formatynda oınalýda. Fınal 23 tamyzda ótkiziledi. Onda «Bavarııa» jáne «Parı Sen-Jermen» komandalary synǵa túsedi.
