Chempıondar lıgasy: «Bavarııa» «Beshıktashqa» bir saǵatta bes gol soqty
ASTANA. QazAqparat - ÝEFA Chempıondar lıgasy 1/8 fınalynyń ekinshi aptasy qyzý oıyndarmen bastaldy, dep habarlaıdy QazAqparat tilshisi.
Óz alańynda Túrkııanyń «Beshıktash» komandasyn qabyldaǵan «Bavarııa» aıtýly qarsylyqqa dýshar bolǵan joq. Esesine osy oıynda goldar da kóp boldy. Qonaqtar sapynda qorǵaýshy Domagoı Vıda 16-mınýtta tikeleı qyzyl qaǵaz alyp, alańnan qýyldy. Taım aıaqtalarda shabýylshy Tomas Mıýller esep ashyp, alań ıelerin alǵa bastady.
Ekinshi taımnyń basynan aıaǵyna deıin mıýnhendik ujym gol soǵýmen boldy: aldymen Kıngslı Koman esepti 2:0-ge jetkizdi, keıin T. Mıýller dýblin toılady, 79-shy jáne 88-mınýtta Robert Levandovskı de eki gol soǵyp, «Bavarııanyń» is júzinde kelesi aınalymǵa ótýin qamtamasyz etti. 14 naýryzda ótetin jaýap kezdesýinde túrkııalyq komandanyń múmkindigi tym azaıyp ketti.
Eýrofýtbol aptasynyń ortalyq kezdesýi sanalǵan «Chelsı» - «Barselona» komandalary búgin ymyramen tarasty. Birinshi taım Ispanııadan kelgen qonaqtardyń tolyq ústemdigimen ótti, muny dopqa ıelik etý kórsetkishiniń 29%-ǵa 71% bolǵanynan da ańǵarýǵa bolady. Biraq qonaqtar muny eseptegi ústemdikke aınaldyra almady.
Ekinshi taımda aǵylshyndyq fýtbolǵa tán jyldam shabýyldan keıin Vıllıan gol soǵyp, «Chelsı» jankúıerlerin qýantty. Alaıda bul qýanysh kópke sozylmady, 75-mınýtta Andres Inestadan pas alǵan álemniń úzdik fýtbolshylarynyń biri Lıonel Messı dopty qaqpanyń tómengi buryshyna toǵyta saldy. Oıyn ary qaraı «ashýly» reńk ala tústi. Aınalasy on bes mınýtta tórt sary qaǵazdyń kórsetilýi de osyny rastasa kerek. Degenmen komandalar basqa gol soǵa almaı, shırek fınal máselesin «Noý Kamp» stadıonynda sheshýge kelisti.
