Chempıondar lıgasy: «Barselona» óz alańynda qarsylasymen teń tústi
NUR-SULTAN. QazAqparat - Búgin fýtboldan UEFA Chempıondar lıgasy toptyq kezeńiniń tórtinshi týr oıyndary ótti, dep habarlaıdy QazAqparat tilshisi.
Atalmysh týrdaǵy basty oıynnyń biri F tobyndaǵy Ispanııanyń «Barselona» jáne Chehııanyń «Slavııa» komandalary arasynda boldy. Kezdesý ıspan jerinde ótkizildi. Degenmen, ıspan fýtbolshylary qarqyndy oıynymen kózge túse alǵan joq. Eki aptadaı buryn qos komanda Chehııada baq synasqan edi. Atalmysh kezdesýde «Barselona» 2:1 esebimen jeńiske jetken edi. Soǵan qaramastan, olardyń oıyn órnegine syn aıtýshylar az bolǵan joq.
«Slavııa» azýly qarsylasyna búgin de tegeýrindi qarsylyq tanyta bildi. Ispandyq klýbtyń shabýylyna laıyqty tótep berdi. Nátıjesinde, oıynnyń birinshi kezeńinde qos komandanyń da qaqpasyna gol soǵylǵan joq. Oıyn 0:0 esebimen teń aıaqtaldy. Tórt oıynnan keıin olar segiz upaı jınap, óz tobynda kósh bastap keledi.
Endi «Barselona» eki oıyn ótkizedi. Aldymen, óz alańynda 27 qarashada Germanııanyń «Borýssııa Dortmýnd» komandasyn qabyldasa, 10 jeltoqsanda Italııada «Intermen» kezdesedi.
Sondaı-aq, búgin Reseıde Sankt-Peterbýrgtiń «Zenıt» klýby G tobynda óz alańynda Germanııanyń «RB Leıptsıg» komandasymen kezdesip, olardan 0:2 esebimen jeńilip qaldy. Oıynnyń 45-mınýtynda nemis klýby sapynan Dıego Demme mergendik tanytsa, 63-mınýtta Marsel Zabıttser esepti ulǵaıta tústi. Osylaısha, «Zenıt» týrnır kestesindegi jaǵdaıyn birshama qıyndatyp aldy. Endi olar jarysty jalǵastyrý úshin qalǵan eki oıynda jeńiske jetýi qajet. Olar 27 qarashada Frantsııanyń «Lıon» komandasyn qabyldasa, 10 jeltoqsanda Portýgalııada «Benfıkamen» sheberlik baıqasady.
Búgin Chempıondar lıgasynda E, F, G, H toptarynda oıyndar ótkiziledi. Jankúıerler olardyń arasynan Anglııanyń «Lıverpýl» jáne Belgııanyń «Genk» klýbtary arasyndaǵy kezdesýge erekshe kóz tigip otyrǵany belgili. Oıyndar elorda ýaqytymen 02.00-de bastalady.
