Chempıondar lıgasy: «Astana» jarystyń alǵashqy satysynan óte ala ma
Elordalyq klýb irikteý satysyn syrt alańda bastaıdy.
Esterińizge sala ketelik, jeńimpaz nebári bir ǵana oıynnyń nátıjesi boıynsha belgili bolady. Bul - álemdegi koronavırýs ınfektsııasy jaǵdaıyna baılanysty qabyldanǵan sheshim. Sondyqtan qos komanda úshin atalǵan kezdesý tartysty ótetini belgili.
Jankúıer kózine kóbirek túse qoımasa da «Dınamo» (Brest) klýbynyń alpys jyldyq tarıhy tasqa basylǵan . Toqsanynshy jyldarǵa deıin zor tabysymen kózge túse qoıǵan joq. Ekinshi lıgada oıyn kórsetti. Táýelsizdik alǵannan keıingi Belarýs chempıonatynyń barlyǵynda baq synap kele jatqan sanaýly komandanyń biri bolyp tabylady.
Bıylǵy jylǵa deıin ortanqol ujymnyń qatarynda sanalyp keldi. 1992 jyly óz elinde qola júldeger boldy. Odan keıin tórtinshi-besinshi orynnan árige asa almaıtyn. 2016 jyly komanda Birikken Arab Ámirliginde tirkelgen «Sohra Overseas» kompanııasynyń qaraýyna ótti.
Keıinnen atalǵan kompanııany kásipker Sergeı Zaıtsevtiń ıeliginde ekeni belgili boldy. Brest oblysynda dúnıege kelgen ol «Dınamoǵa» kórsetken qoldaýy jóninde óz pikirin bildirip ótti. «Men bala kezimnen «Dınamoǵa» jankúıer boldym. Birneshe jyl buryn komanda bankrotqa ketýge az qaldy.
Osylaısha komanda Belarýs chempıonatynyń joǵary lıgasynan tómendeýi múmkin edi. Sol sátte olarǵa qoldaý bildirýge sheshim qabyldadym», - dedi ol.
Bul komanda fýtboldan Belarýs kýbogynda 2006/2007, 2016/2017, 2017/2018 jyldarda jeńimpaz atandy. Nátıjesinde Eýropa lıgasy (ÝEFA kýbogy) oıyndarynda úsh márte baq synaýǵa múmkindik aldy. Degenmen osy týrnırde 2007/2008 jylǵy kezeńde birinshi irikteý satysynda Latvııanyń «Metallýrg» (Lıepaı) komandasymen kezdesip, qarsylasyna jol berip qoıdy. Syrt alańda 1:1 esebimen teń túskenimen, óz alańynda 1:2 esebimen jeńilip qaldy. 2017/2018 jylǵy kezeńde de dál osyndaı jaǵdaı qaıtalandy. Avstrııanyń «Altah» klýbymen syrt alańda 1:1 esebimen teń túsip, óz alańynda 0:3 esebimen jol berdi. Al 2018/2019 jylǵy kezeńde óz
tarıhynda eýrokýbok oıyndarynyń ekinshi satysyna joldama aldy.
Aldymen Grekııanyń «Atromıtos» klýbyn (4:3, 1:1) orta jolda qaldyryp, odan keıin Kıprdiń «Apollon» klýbyna (1:0, 0:4) jol berip qoıdy.
Komanda quramynda ataǵy keńge jaıylǵan tanymal fýtbolshylar joq.
Dese de Artem Mılevskıı, Evgenıı Hacherıdı sekildi kezinde Ýkraına ulttyq quramasynyń namysyn qorǵaǵan tájirıbeli sportshylar bar.
Olardan basqa da sheberligi shyńdalǵan fýtbolshylar kezdesedi.
Al «Astana» bizdiń elimizdiń atynan altynshy jyl qatarynan Chempıondar lıgasynyń irikteý kezeńinde synǵa túsip keledi. Máselen, 2015/2016 jylǵy kezeńde atalmysh týrnırdiń toptyq kezeńine deıin jetti. Odan keıingi úsh jylda eki márte úshinshi irikteý kezeńinen asa almasa, bir márte pleı-off kezeńine deıin bardy. Nátıjesinde olarǵa sońǵy tórt jylda Eýropa
lıgasynyń irikteý kezeńine qatysýǵa múmkindik berildi. Odan súrinbeı etken elordalyqtar toptyq kezeńinde el namysyn qorǵady. Al 2016/2017 jylǵy kezeńde Eýropa lıgasynda jarystyń 1/16 fınalyna deıin jetti. Odan keıin toptyq kezeńnen ári asa alǵan joq.
Esterińizge sala ketelik, «Dınamo» (Brest) jáne «Astana» komandalary arasyndaǵy kezdesý elorda ýaqytymen 00.00-de bastalady. Oıyn «Qazsport» telearnasynan tikeleı efırde kórsetiledi.
