Chempıondar lıgasy: «Astana» úshinshi irikteý kezeńine joldama aldy
ASTANA. QazAqparat - Búgin elordanyń «Astana Arena» stadıonynda ótken Chempıondar lıgasynyń ekinshi irikteý kezeńinde «Astana» - «Spartak» arasyndaǵy kezdesý 1-1 esebimen teń aıaqtaldy, dep habarlaıdy QazAqparat.
Osydan biraz ýaqyt buryn qarsylastarynyń alańyna baryp, 1-0 esebimen jeńispen oralǵan «Astana» fýtbol komandasy Chempıondar lıgasynyń úshinshi irikteý kezeńine joldama alyp otyr.
Aıta keterligi, búgingi oıynnyń alǵashqy 45 mınýttyq kezeńi teń ótkenimen kelesi bóliginde «Astana» fýtbol komandasynyń 23 nómirli oıynshysy Patrık Tvýması qarsylastardyń qaqpasyna gol soǵyp, astanalyqtardy alǵa shyǵarǵan bolatyn. Degenmen, qarsylastar tez arada es jınap, oıynnyń 72-shi mınýtynda jartylaı qorǵaýshy Edgar Vardanıan «astanalyqtardyń» qaqpasyna qarymta gol saldy.
Qazaq eliniń tórinde ótken teńbil dop dodasynyń bas qazysy qyzmetin grekııalyq Haralambos Kalogeropýlos atqardy. Bul fýtbol mamany Eýrokýbok kezdesýlerinde 2015 jyldan beri qazylyq etip kele jatyr. Al Haralambos Kalogeropýlostyń kómekshileri - Trıfon Petropýlos pen Aleksandros Grevınıs, qosymsha tóreshi qyzmetinde - Praksıtelıs Zaharıadıs boldy.
Bul kezeńde jeńiske jetip, úshinshi irikteý satysyna ótken komanda polshalyq «Legııa» men fınlıandııalyq «Marıehamn» arasyndaǵy kezdesýdiń jeńimpazymen jasyl alańda kezdesetin bolady. Bul eki komanda erteń ózara baq synaıdy.
Degenmen, qazirdiń ózinde polshalyq buqaralyq aqparat quraldary Chempıondar lıgasynyń úshinshi irikteý kezeńinde «Astana» men «Legııa» komandasynyń kezdesetindigin aıtýda. Óıtkeni, polshalyqtar qarsylastaryna qonaqqa baryp, 3-0 esebimen jeńip ketken edi.
«Astana arena» stadıonynda ótken kezdesýdi 20500 kórermen tamashalady.
