Chempıondar lıgasy: «Astana» penaltı arqyly «Sýteskadan» basym tústi
ASTANA. QazAqparat - Búgin, 11 shildede elordadaǵy «Astana-arena» stadıonynda fýtboldan Chempıondar lıgasy birinshi irikteý kezeńinde «Astana» komandasy Chernogorııanyń «Sýteska» klýbyn qabyldady, dep habarlaıdy QazAqparat tilshisi.
Biz budan buryn «Astana» jankúıerlerin taǵy da qýanta ala ma» degen taqyrypta oıymyzdy bildirgen edik. «Sýteska» klýbynyń qurylǵanyna toqsan jylǵa jýyqtasa da halyqaralyq deńgeıde kózge túse qoımaǵan. Búginde komanda quramynda negizinen jergilikti túlekter oıyn kórsetedi.
Atalmysh kezdesýde «Astana» quramynda Erıch, Rýkavına, Anıchıch, Klıaınhaısler, Mýjıkov, Despotovıch, Tomasov, Maevskıı, Postnıkov, Mýrtazaev, Shomko shyqsa, «Sýteska» bapkerleri Gılen, Nedıch, Tsetkovıch, Lonchar, Býlatovıch, Merdovıch, Stefanovıch, Mı. Výchıch, Ma. Výchıch, Sh. Kordıch, Tsıtsmıl syndy fýtbolshylarǵa senim artty. Alǵashqy mınýttarda qos komanda bir-birine saq qarap oınaýǵa kóńil bóldi. Oıynnyń 7-mınýtynda «Astananyń» shabýylshysy Djordje Despotovıch qaqpaǵa dop baǵyttaǵan edi. Degenmen ol tepkeni qonaqtar qaqpashysy Vladan Gılenniń qolynan tabyldy. Al 10-mınýtta astanalyq Serikjan Mýjıkov te «Sýteska» qaqpashysyn mazalap kórdi.
Oıyn barysynda chernogrııalyq ftbolshylar da qarsy shabýyldarǵa shyǵyp, bizdiń qaqpa mańynda boı kórsetip jatty. Alǵashqy 20 mınýtta alań ıeleri basymdyq kórsetkenimen, olardyń eshqaısysy golǵa aınalǵan joq. Kezdesýdiń 29-mınýtynda qonaqtar qaqpasyna penaltı belgilendi. «Sýteska» klýbynyń qorǵaýshysy óziniń aıyp alańynda Djordje Despotovıchti shalyp shyqty. Oıynnyń bas tóreshisi - vengrııalyq maman Ferents Karako oılanbastan 11 metrlikti nusqady. Bul múmkindikti «Astananyń» shabýylshysy Roman Murtazaev múlt jibergen joq.
Ekinshi kezeń bastala salysymen Serikjan Mujyqov birneshe qaýipti sátti uıymdastyrdy. Degenmen, olar dittegen maqsatyna jetken joq. Al 64-mınýtta Marın Tomasov 25 metrdeı qashyqtyqtan aıyp dobyn oryndaǵan edi. Alaıda ol qaqpadan sál ǵana qıys ketti. Oıyn 1:0 esebimen «Astananyń» jeńisimen aıaqtaldy.
«Astana» qarymta oıynyn 18 shildede ótkizedi. Bul juptyń jeńimpazy ekinshi irikteý kezeńinde Danııanyń «Mıdtıýllann» komandasymen 24 jáne 31 shilde kúnderi kezdesedi.
Keshe, 10 shildede Eýropa lıgasy birinshi irikteý kezeńinde Qostanaıdyń «Tobyly» syrt alańda Grýzııanyń «Samtredıa» klýbyn 1:0 esebimen jeńip qaıtty.
«Tobyl» eýrokýbok oıyndaryna birneshe jyl úzilisten keıin qaıta oralyp otyr
Sondaı-aq, Eýropa lıgasynda elimizdiń atynan synǵa túsetin Almatynyń «Qaıraty» Andorranyń «Engordan», Pavlodardyń «Ertisi» Lıtvanyń «Trakaı» klýbtarymen 12 shildede syrt alańda kezdesedi.
