Chempıondar lıgasy: «Astana» horvatııalyq «Dınamodan» basym túse ala ma
ASTANA. QazAqparat - Búgin, 7 tamyzda elordalyq «Astana» fýtboldan Chempıondar lıgasy úshinshi irikteý kezeńindegi alǵashqy oıynyn ótkizedi. Olar óz alańynda Horvatııa astanasy - Zagreb qalasynyń «Dınamo» komandasyn qabyldaıdy, dep habarlaıdy QazAqparat tilshisi.
«Astana» buǵan deıin birinshi irikteý kezeńinde Chernogorııanyń «Sýteska» klýbyn orta jolda (1:0, 2:0) qaldyrdy. Odan keıingi ekinshi irikteý kezeńinde Danııanyń «Mıdtıýlland» klýbyn (2:1, 0:0) tize búktirdi. Endigi kezekte - «Dınamo» komandasy tur. Elordalyq klýb olardan aılasyn asyra alsa, pleı-off kezeńine joldama alady. Pleı-off satysynda oza shapsa, Chempıondar lıgasynyń toptyq kezeńine shyǵady. Ol jarys satysynda qarsylasyna ese jiberip alǵan jaǵdaıdyń ózinde Eýropa lıgasynyń toptyq kezeńinde baq synaıdy.
«Dınamo» komandasy 1945 jyly qurylǵan. Zagreb qalasyndaǵy «Gradjıanskı», «Konkordııa» jáne HAShK klýbtarynyń birigýi nátıjesinde tusaýyn kesti. Komanda 1945-1991 jyldar aralyǵynda búgingi ataýymen oıyn kórsetse, 1991-1993 jyldarda «HAShK Gradjanskı» ataýymen jasyl alańǵa shyqty. Al olar 1993-2000 jyldarda «Kroatsıa» ataýymen synǵa túsip, odan bergi jyldarda burynǵy ataýyna qaıta oraldy.
«Dınamo» óz elindegi birinshiliktiń 23 dúrkin chempıony bolǵan. Bul - Horvatııa komandalary arasyndaǵy rekordtyq kórsetkish. Sondaı-aq, Kýbok oıyndarynda 21 márte jeńis tuǵyryna kóterildi. 1967 jyly qazirgi Eýropa lıgasynyń, ol kezdegi Jármeńke kýbogynda jeńimpaz atandy.
Atalmysh komanda bıylǵy Chempıondar lıgasyn ekinshi irikteý kezeńinen bastady. Óz alańynda «Hapoel Beer-Sheva» komandasyn 5:0 esebimen oısyrata jeńip, odan keıin olarmen syrt alańda 2:2 esebimen teń oınady. Qos oıyn nátıjesimen «Dınamo» jarystyń kelesi satysyna joldama aldy. Jalpy, horvatııalyq klýb Chempıondar lıgasyna bıyl 17 márte qatysyp otyr. Onyń ishinde 6 márte toptyq kezeńde synǵa tústi. Al sońǵy 7 jylda 4 márte osy kezeńge shyqqan eken. Osynyń ózi kóp jaıdy ańǵartady. «Dınamo» byltyr da Chempıondar lıgasy toptyq kezeńinde baq synap, onda Italııanyń «ıÝventýs», Ispanııanyń «Sevılıa» jáne Frantsııanyń «Lıon» sekildi komandalaryna qarsylas atandy. Olardan barlyq oıynda jeńilip, birde-bir gol soǵa alǵan joq.
«Dınamo» komandasy quramynda fýtboldan bıylǵy álem birinshiligine óz eliniń quramasy sapynda qatysqan bir oıynshy bar. Atap aıtqanda, Domınık Lıvakovıch quramasynyń tolaǵaı tabysqa qol jetkizýine súbeli úles qosty.
«Astana» men «Dınamo» arasyndaǵy kezdesý búgin 19.50-de bastalady. Bul oıyndy «Qazsport» telearnasy tikeleı efırde kórsetedi.
Sondaı-aq, 9 tamyzda Almatynyń «Qaıraty» syrt alańda Chehııanyń «Sıgma» klýbymen kezdesedi. Ol oıyn Astana ýaqytymen 22.50-de bastalady.
Foto: fcastana.kz
