Chempıondar lıgasy: «Astana»- «Benfıka» fýtbol komandalarynyń kezdesýi bastaldy

Búgingi matchta, ókinishke oraı, «Astana» sapynda Jolshıev bolmaıdy. Qarsylastardyń qatarynda alty birdeı mańyzdy oıynshy: Salvıo, Lýızao, Nelson Semedý, Feısa, Lındelef, Gaıtan alańǵa shyǵa almaıdy.

«Benfıka - óte qaharly qarsylas. Biraq biz óz úıimizdemiz jáne fýtbol shaıqasyna qulshynyp otyrmyz. Biz upaı enshileý úshin barlyǵyn isteımiz. Ulttyq chempıonatta qıyn machtar ótti. Oıynshylar jaqsy oıyn órnegin kórsete alatyndaryna senimdi. Jankúıerlerdiń úlken qoldaýymen biz qarsylastarǵa joıqyn qarsylastyq kórsetemiz», - dedi «Astana» fýtbol klýbynyń bapkeri Stanımır Stoılov match aldyndaǵy baspasóz máslıxatynda.

Óz kezeginde «Benfıka» bapkeri Astanada oıyn qıyn bolatyndyǵyn aıtýda.

«Jerebeden keıin biz qarsylastardyń kúshin baǵamdadyq. Astanada áli eshkim jeńiske jetken joq. Bul «Astananyń» myqtylyǵyn bildirse kerek. Biz qarsylasty syılaımyz, biraq jeńiske jetýdi qalaımyz», - dedi Rýı Vıtorııa.

Eske sala keteıik, bunyń aldynda «Astana» men «Benfıka» kezdesken bolatyn. Bıyl qyrkúıekte Portýgalııada ótken matchta lıssabondyqtar sapyndaǵy Nıkolas Gaıtan komandasyna jeńis syılaǵan bolatyn. Búgingi matchta argentınalyq shabýylshy oınaı almaıdy, sebebi sońǵy kezdesýde ol qyzyl qaǵaz aldy.

«Benfıka» S tobynda toǵyz upaımen kósh bastap keledi. «Astana» komandasy bolsa, eki ball jınap, tórtinshi orynǵa jaıǵasqan.