Chempıondar lıgasynyń debıýtanty «Qaırat» qaı qarsylasynan upaı oljalaýy múmkin

ASTANA. KAZINFORM – Sport kommentatory Ravıl Ashyǵalı Chempıondar lıgasynyń negizgi kezeńi aıasynda Almatyǵa «Real Madrıd» komandasynyń neshe oıynshysy kelýi múmkin ekenin aıtty. 

– TOP klýbtardyń birneshe quramy bolady, qarsylasqa baılanysty da quram jasaqtaıdy. Mysaly «Chelsı» Konferentsııa lıgasy aıasynda ótken jyly «Astanaǵa» qarsy oıynynda úshinshi quramyn jiberdi. Meniń oıymsha, «Real Madrıdtiń» basty 11 oıynshysy kelmegenimen, 4-5 negizgi oıynshysy anyq keledi. Sebebi «Real Madrıd úshin ótken jylǵy sátsizdikten keıin, bıyl Chempıondar lıgasy – basty týrnır. Komandanyń jańa bapkeri Habı Alonso jeńiske jetkisi keledi. Ol belgili bir qarsylastardy elemeıtin, joǵarydan qaraıtyn bapker emes, - dedi ol «Jibek joly» telearnasyndaǵy «Búgin LIVE» baǵdarlamasynda.

Sondaı-aq kommentator «Qaırat» komandasynyń qaı qarsylasynan upaı alýǵa múmkindigi bar ekenin boljady.

– Bıyl Chempıondar lıgasyna 4 komanda alǵash ret qatysyp jatyr eken. Sonyń biri – «Qaırat», ekinshisi – «Pafos». Olardyń almatylyq klýbpen deńgeıi shamalas. Kıprlik komandadan upaı alýǵa bolady. Alań sapasynyń nasharlyǵy, aýa raıy degen sekildi birneshe faktor keri áserin berse, bálkim eýropalyq granttardan da upaı alýymyz múmkin. Ortańqol «Brıýgge», «Kopengagen» komandalarymen de teń oınaýǵa bolady. Sátin salsa, tipti jeńip ketýimiz múmkin, - dedi Ravıl Ashyǵalı.

Sóz sońynda fýtbolda naqty bir boljam jasaý qıyn ekenin atap ótti. 

Aıta keteıik, «Qaırat» fýtbol klýbynyń Chempıondar lıgasy negizgi kezeńindegi qarsylastary anyqtaldy. Almatylyq klýb endi «Real Madrıd» (Ispanııa), «Inter» (Italııa), «Arsenal» (Anglııa), «Brıýgge» (Belgııa), «Sportıng» (Portýgalııa), «Olımpıakos» (Grekııa), «Pafos» (Kıpr), «Kopengagen» (Danııa) klýbtarymen oınaıdy.