Chempıondar lıgasynda «Qaırattyń» qarsylasy bolǵan oıynshy almatylyq komandaǵa aýysty
ALMATY. KAZINFORM — Chempıondar lıgasynyń irikteýinde «KýPS» quramynda «Qaıratqa» qarsy oınaǵan fınlıandııalyq ıAakko Oksanen almatylyq komandaǵa qosyldy.
«Qaırat» fýtbol klýby 25 jastaǵy fınlıandııalyq jartylaı qorǵaýshy ıAakko Oksanenmen kelisimshartqa otyrǵanyn habarlady. Kelisim 2027 jylǵy jeltoqsanǵa deıin jasalǵan.
Ol kásibı mansabyn fınlıandııalyq «HIK» klýbynda bastaǵan. 2018 jyly «Brentford» klýbyna aýysyp, ekinshi komandasynda oınady. Keıin «Ýımbldon» jáne shotlandııalyq «Morton» klýbtarynda óner kórsetken. Al 2022 jyldan beri jartylaı qorǵaýshy fınlıandııalyq «KýPS» komandasynyń namysyn qorǵady.
Jalpy osy maýsymda Oksanen 51 match ótkizip, 4 gol soǵyp, 8 nátıjeli pas bergen. Ol Fınlıandııa ulttyq quramasynda 1 match, U-21 jastar quramasynda 15 match oınap úlgergen.
Eske salaıyq, osy maýsymda ıAakko Oksanen «Qaıratpen» ÝEFA Chempıondar lıgasynyń ekinshi irikteý kezeńinde kezdesken. Eki matchtyń qorytyndysy boıynsha almatylyqtar 3:2 esebimen jeńiske jetti.